İşbu Muharremü'l-harâmın yirmisekizinci salı günü tavâif-i askeriyyenin müstahikk oldukları bir kıst mevâcibleri tehyie ve ihrâc olunup kā'ide-i Devlet-i aliyye üzere Kubbealtı'nda ocaklara taksîm ve tevzî' ve vazîfe-hârân-ı dergâh-ı mu'allâ-erkânın bu vesîle ile hâlleri terfîh ve dâ'ire-i ma'îşetleri tevsî' olundu. Doksanyedi Ramazanında verilen kısteyn mevâcibiyle bu kıst beyninde vâki' olan müddetde destyârî-i hayır-hâhân-ı Devlet-i aliyye ile otuziki dîvânî kiseye karîb sa'y-i mîrî hâsıl olmuşdur. (66-a)