Bundan akdem tafsîl ve beyân olunduğu üzere aʿdâ-yı dînin hilâf-ı uhûd u şurût Kırım'a istîlâları ve bâ-husûs bu vazʿ-ı müstehîlü'l-kabûlü Devlet-i aliyye hazm etmek zemîninde sened iddiʿâları hâric-i hîta-i tahammül olup berren ve bahren tertîb ü tehyi'esine nihânî bed' ü mübâşeret olunan tedârükât ve levâzımât-ı seferiyyenin esbâb-ı tekmîline bir an akdem müstaʿînen billâhi teʿâlâ ikdâm ve himmet mütehattim-i zimmet-i vükelâ-yi saltanat olmağla binâen-aleyh Devlet-i aliyye'nin el-yevm mevcûd olan sagîr ü kebîr sefâini ne mikdâra bâliğdir ve lede'l-iktizâ iʿmâli mesbûk olan tüccâr gemileri kaç kıtʿa olabilir ve Akdeniz ve Karadeniz'in ne kadar sefâin ile idâresi mümkindir, ale't-tafsîl defter olunmak üzere kapudan paşa hazretlerine tenbîh ve te'kîd ve hazm ü ihtiyâta riʿâyetde iʿmâl-i fikr-i sedîd kılındı. (48-a)