Fas hâkimi Mevlây Muhammed bin Abdullah bin İsmail Cenâbî bundan akdem atabe-i aliyye-i hazret-i cihândâriye tertîb eylediği hedâyayı Musulî olan Seyyid Tâhir nâm büyük elçisine teslîm ve i'tâ ve belde-i Fas'dan ihrâc ve isrâ edüp birkaç gün mürûrundan sonra zikr olunan hedâyânın baʿzısını müşârün-ileyh mahv u isbât etmek irâdesinde olmakdan nâşî sefîr-i merkūma irsâl-i peyâm ve hedâyâ vaz' olunan sandukalardan bi't-tahsîs matlûbu olan sandukayı îsâl etmesini işâret ve ifhâm edüp, hevâları müsâʿid olduğu sûretde geriden gelecek tekmile-i hediyyeye ʿadem-i intizâr ve âhar kimesne ile verâsından ba's ü tisyâr olunacağını dahi tahrîr ve iş'âr etmekle sefîr-i merkūm zikr olunan sanduka-i matlûbeyi ibʿâs (44-b) etdikden sonra dîde be-sûy-i intizâr olduğu bâd-i muvâfık hübûb ve der-akab bâdbân-küşâ-yı savb-ı matlûb olarak vâsıl-ı Âsitâne-i saʿâdet ve ânifen zikr olunduğu üzere hediyyeyi arz-ı pâye-i serîr-i saltanat etmişidi. Fas hâkimi müşârün-ileyh Cenâbî mukaddemâ celb ve baʿdehu mahv u isbât eylediği sandukaya mücevher-bendlü bir kabza kılıç ve bir aded incü tesbîh ve bir mücevher sâʿat ve elmas ve yakut ile tersîʿ olunmuş bir kıt'a tâc ve bir gerdanlık ve bir çift zümrüd küpe ve bir mücevher hamâil vaz' ve altı re's cevâri-i zenciye ve bir re's tavâşî dahi zamm edüp bu def'a Elhac Mekkî nâm diğer sefîriyle kıble-i mülûk ü ikbâl ve mahatt-ı rıhâl-i ikbâl olan Âsitâne-i hümâ-âşiyâneye îsâl edüp sefîr-i merkūm Bâbıâlî'ye da'vet olunup sadrıazam hazretleri tarafından bir karsak ferve ilbâs ve bir çiçekli şal leffiyle ser-i iftihârı felek-mümâs kılınup maʿiyyetinde olan dört nefer âdemlerine dahi haftanlar iksâ ve ikāmetleriyçün mahall-i münâsib ta'yîniyle resm-i mihmân-nevâzî îfâ kılındı.