Devlet-i ebed-kıyâmın zuhûr ve neş'eti ve bünyân-ı ikbâlinin dest-i te'yîd-i Rabbânî ile resânet ve hasâneti sultân-ı serîr-i risâlet ve hâkān-ı kişver-i nübüvvet şefîʿ-i rûz-ı cezâ kāid-i ketîbe-i rüsül ü enbiyâ aleyhi ve alâ âlihi ve sahbihi ez ke't-tahâyâ hazretlerinin şerîʿat-ı mutahhara ve âsâr-ı sünen-i münevverelerine teşebbüs ve temessük ile vücûda geldiği ve her bâr ki havâdis-i melevân sebebiyle bu hânedân-ı adâlet-erkâna bir gûne hatar u keder eseri âyine-i kevnde aks-endâz-ı hudûs olmak hâletleri ihsâs oluna, selâtîn-i mâziye hazerâtı أنار الله برهانهم urve-i vüskā-yı kitâb ü sünnet ve bâb-ı iʿcâz-meʾâb-ı hâkān-ı iklîm-i nübüvvete temessük ve teveccüh etmeleriyle devâhî-i mezkûre ber-vech-i suhûlet ber-taraf olup husûsâ aʿlâm-ı cihâd u gazâ aktâr-ı âfâkda şukka-güşâ oldukça kahr-ı aʿdâ-yı liʾâm ve tedmîr-i küffâr-ı hizlân-fercâm bu niyyet-i hâliseyi nakş-ı sahâʾif-i zamâʾirleri kalmaları mülâbesesiyle husûl bulduğu zâhir ve bâhir olan kazâyâdandır. Moskov keferesinin bi-kazâʾiʾllâhi teʿâlâ sefer-i sâbıkda terakkî-i kuvve-i istidrâciyyeleriyle leşker-i islâm nasîb-i evfâ-yı zafer ü nusretle iğtinâm edemediklerinden sû-be-sû husemâ-yı mülk ü millet memâlik-i islâmiyyeye itâle-i dest-i tamâʿ dâʿiyelerine düşdüklerine binâen Devlet-i aliyye dahi tertîb-i asâkir ve tanzîm-i mühimmât ve zehâʾir ile muhâfaza-i kılâʿ ve muhârese-i suğûr u bikāʿ mukaddemâtını müstaʿînen billâhi teʿâlâ temhîde mübâşeret eylediği (43-b) cümle indinde nümâyân olup emâkin-i müteberrike ve büldân-ı muʿarrefe-i mübârekeden Haremeyn-i şerîfeyn ve Mısr ve Şâm ve Bağdâd-ı behişt-âbâdda meşâhîr-i muhaddisîn ve ulemâ-yı âmilîn halka-bend-i ictimâʿ ve kütüb-i sahîha-i ehâdîs-i nebeviyyeden Kitâb-ı Buhârî ve Şifâ-i şerîf'i istimdâd-ı feth ü nusret ve şürûr-ı aʿdâdan her hâlde selâmet-i devlet ve emniyyet-i ümmet niyyet-i sâdıkasıyla hatm eylemeleri fazl-ı Hakk ile galebe-i cünûd-ı muvahhidîn ve makhûriyet-i ahzâb-ı şeyâtîni müstelzim olacağında iştibâh olmamağın Mekke-i mükerreme'de sâkin muhaddisîn ve ulemâyı nezd-i saʿâdetlerine celb ve ticâh-ı beyt-i şerîf ve sâha-i harem-i münîfde Buhârî ve Şifâ-i şerîf'i tilâvet ve hatme mübâderet ve aʿkab-ı mecâlisde be-tahsîs hitâmı akabinde kâffe-i ulemâ ve sulehâ ve meşâyih ve ahâlî ve mücâvirîn bir yere gelüp mülk-i maʿmûr-ı islâmın mekr ü gezend-i küffârdan masûn olmasını ve ecnâd-ı zafer-iʿtiyâdın eynemâ teveccehû isbât-ı kadem ve hulûs-i kalb ve hamiyyet-i dîniyye ile fiʾe-i müşrikîn üzerlerine gâlib ve iʿlâ-i kelimetuʾllâha muvaffak olmalarını rûh-ı mukaddes-i sâhib-i dîhîm-i levlâk ve muʿcize-i bâhire-i muhâtab-ı hitâb-ı kerîm ve mâ-erselnâke şefîʿ ittihâz eyleyerek dergâh-ı âciz-penâh-ı Rabbânî'den duʿâ ve istidʿâ ve niyâz ü recâ eylemelerini tavsiye ve telkîne ve savb-ı vâlâlarından bu emr-i hayrın şurût-ı lâyıkasıyla îfâsına nezârete himmet buyurmaları meʾmûlü kāʾime-i muhâlasat-müfâd tahrîrine bâdî olmuşdur. Ledeʾl-vusûl tıynet-i kudsî-fıtretlerinde merkûz olan hayr-hâhî-i âmme muktezâsınca bu matlabın (44-a) ber-vech-i sezâ tanzîm ve itmâmına ibtidâr ve îfâ buyurulduğu sûretde karîben eseri zuhûrunda şübhe olmayacağı ve cümlemizin melâz ve müstenedimiz olan Fahrü'l-enbiyâ ve'l-mürselîn ve kāʾidü'l-izzü'l-muhaccelîn efendimiz hazret- lerinin samsâm-ı adû-iltikām-ı rûhâniyyet-i şerîfeleri niyâm-ı gayretden insilâl ile aceze-i ümmetinin husûm-ı ırz u cânları olan sunûf-ı müşrikînin rikāb-ı gurûr-iktisâbları kırâb-ı suyûf-ı mücâhîdîn olacağı eltâf-ı şâmile-i ilâhiyyeden me'mûl-i âcizânemiz idüğü ma'lûm-ı hakāyık-mersûmları buyuruldukda vech-i meşrûh üzere harekete himmetleri me'mûldür.