Evvel ve âhir sebt-i sahâif-i me'âsir kılındığı üzere esbâb-ı zâhiriyye-i gazv ü cihâd ve levâzım-ı âdiye-i udde-i itâdı mahzâ yâverî-i tevfîk-i Bârî ve medded-kârî-i duʿâ-yi tâcdârî ile hasbemâ yüsâidühü'z-zamân tehyie ve iʿdâd ve bi-hamdihi sübhânehü ve teʿâlâ az vakitte gerçi Devlet-i aliyye kesb-i revnak ve istiʿdâd eyledi ancak "Ve mâ'n-nasru illâ min ʿindillâh" medlûl-i şerîfi üzere esbâba adem-i iʿtimâd ve mücerred inâyet-i Hakk'a istinâd edüp rûhânî tedârükâta dahi mübâşeret ve cahd ü inkârı memnûʿ olan havâssın icrâsına himmet havâli-gerd-i kalb-i evliyâ-yi devlet olduğuna binâen İbn Hacer Askalânî'nin mukaddemede ve Şihâb'ın dîbâcede havâss-ı kesîrelerini tahrîr ettikleri baʿde Kitâbullah asahh-ı kütüb olan Sahîh-i Buhârî ve Kitâb-ı Şifâ'nın baʿzı emâkin-i müteberrikede krâat olunması teshîl-i umûr-ı devlet ve hubûb-ı nesîm-i fevz ü nusrete medâr ittihâz olunmağla Haremeyn-i şerîfeyn ve Şam ve Mısır ve Bağdâd ve sâir bilâdda mütemekkin mücâvirîn ve zühhâd ve nüssâk ve ubbâda surreler îsâl ve tilâvete nezâret içün vülât-ı memâlike ferden ferdâ kavâim-i aliyye makām-ı sadâretden tahrîr ve irsâl olundu. (43-a).