Mûmâ-ileyh Şehîd Ali Paşa'nın yeğenliği ile meşhûr-ı âfâk ve altmış senesi Şevvâlinde kâğıd-ı Enderûn emânetiyle zümre-i hâcegâna iltihâk edüp birkaç vezîre kapu kethüdâsı olmak takrîbi ile bağteten necm-i âfil-i şöhreti şa'şa'a-perdâz-ı zuhûr ve temâdî-i eyyâm ile devr-i menâsıb eyleyerek kesb-i taʿayyün-i bî-kusûr etmişidi. Nazm: وَ إِذَا كَانَتِ النُّفُوسُ كِبَاراً تَعِبَتْ فِي مُرَادِهَا الْأَجْسَامُ medlûlü üzere kibr-i nefs ve hubb-ı câh ile eczâ-yı râhatı dâim-tebâh ve mütehassir ve mütehâlik olduğu menâsıb-ı Bâbıâlî tahsîlinde haylice tahrîk-i şifâh edüp adem-i safvet-i bâlî ve muʿallel-i bi'l-farz olan kîl u kāli husûl-i ümniyyesine sedd-i sedîd ve erbâbü'd-düvel-i mülhemûn mazmûnu üzere Bâb-ı âsafî'ye takrîb murâd olundukça tebʿîd olunur idi. Akrân ve ahdânından biri nâil-i câh-ı refîʿ olsa der-akab zücâc-1 mizâc-ı hâtırı şikeste ve ha- reket-i kuvve-i hasedden nâşî mahmûm ve hasta olup hânesi mesâvî-i devleti kâr edinmiş derbederlere me'vâ ve nâil-i emânî olmayan nâ-ehillere mahall-i bess-i şekvâ olduğundan fazla ittifâk-ı ârâ ile karâr-gîr-i nizâm olan umûrun küllîsini tezyîf ve ser-i kârde olanlar muʿallim-i evvele sânî iseler dahi akıllarını teshîf eder idi. Hâsıl-ı kelâm mûmâ-ileyhin vefâtı hakkında mahz-ı rahmet ve ümniyye-i câh takrîbi ile bu dâr-ı gurûrda çektiği ıztırâbdan sâhil-res-i selâmet olmuştur. (42-b)