Merhûmun ibtilâc-ı fecr-i ikbâlinden küsûf-ı şems-i ömrüne dek tâliʿi kuvvetde ve kevkeb-i bahtı evc-i izzetde olup meʾmûr (143a) olduğu hidemât-ı cesîmenin eczâ-yı terkîbinden olan avene-i hıls mülâbesesiyle her mansıbda memdûh ve gayr-i mezmûm ve her maddede ümmî iken izhâr-ı maʿlûm edüp Mukaddeme-i İbn-i Haldun'un ekser mahallini hâfız ve idâre-i umûr-ı sâmânında hayli müteyakkız olduğundan gayri zebân-ı azbü'l-beyânı midrâr-ı kelâm-ı hüsnü'l-insicâm ile dâʾimîü'l-feyezân ve her husûsda bir dakīka isbâtıyla engüşt-nümâ-yı deverân idi. Tertîb eylediği mukaddemât-ı lafza-i celâle kasem ile mukadder ve indinde sîret-i vâlid-i mâcidi eser-i nass gibi muʿteber olup dâmen-ı ameli ihâta-i aklı kadar levs-i hıyânetden pâk ve mutasaddî-i emr ü nehy olanlar sinân-ı zebân-ı bî-âmânından zehre-terâk idiler, sâye-i Devlet-i aliyye'de hâce-i bender-gâh-ı servet ü yesâr iken atiyyât ve isrâfâta adem-i meylinden nâşî yedinden bir şahs mâlik-i dînâr olmayup etbâʿı kāniʿ ve hursend ve her biri birer vechile dâiresinde pâbend idiler. İzzet Paşa merhûmun sadâretinde mesned-i kethüdâyîde an-asıl bir sâhib-vücûd bulunması muhâlif-i emzice kurenâsı olmakdan nâşî o esnâda kethüdâ-yı sadr-ı âlî bulunan Halîl Paşa'yı câh-ı mezkûrdan tenzîl ve karîn-i sû-i sevkiyle Lâleli Mustafa Efendi'yi makām-ı kethüdâyîye tavsîl etmişler idi. Ankā-yı kāf-ı istiğnâ olan sadr-ı müşârün-ileyhin ke'l-cebeli'r-râsih mekânet ve menâʿati ve kethüdâ-yı cedîdin nâ-şinâsî-i umûr-ı külliyye ve cüz'iyyede olan [istiʿdâd] ve kābiliyeti bâʿis-i taʿtîl-i hutūb-ı devlet ve vesîletü'z-zuhûr-ı redâet ve şenâʿat olduğundan gayrı kurenânın dahi enbân-ı ümîdleri derâhim ve denânîr-i mümsike ile memlû ve sandukça-i arzuları taraf-ı nutef-i etrâf ile tâ be-gelû olmağla Mustafa Efendi'nin azlini istisvâb ve vakte nazaran mutavassıtü'l-hâl add eyledikleri sâhib-i tercümeyi sadâret kethüdâlığı ile kâm-yâb eylediler. (143-b) Garâbet bunda ki hevâlarına muvâfık ve irâdelerine mutâbık zann etdikleri zât az müddetden sonra haklarında feth-i derîçe-i nemîm-sâzî ve âmed-şüd eden züvvâra vâdi-i mesâvî ve siʿâyetlerinde izhâr-ı terk-tâzî edüp âsâyiş ve rahatlarını selb ve alenen âğâz-ı şetm ü cürûb eylediğinden gayrı mukaddemâ kethüdâlığı istîzân olundukda mazbûtü'l-lisân olmadığı taraf-ı hümâyûndan beyân ve âhar kimesne ihtiyârı fermân buyuruldukda hüsn-i terbiyye ile istihdâmı kābildir deyü emr-i tercîhi tasrîh ve çok geçmeden nebtîz-i tîz-lisân ile cümlesini zahm-dâr ve cerîh eylediği şehenşâh-ı velâyet dest-gâh hazretlerinin kerâmetlerine haml olunmuşdur.