Müşârün-ileyhin icmâl-i hâli Enverî Efendi'nin târîhinde eğerçi muharrer olup ancak bu makūle vüzerâ-yı ʿizâm ve küberâ-yı ricâl-i zevi'l-ihtirâmın tercümelerinde tafsîl ve işbâʿ ve efʿâl ü etvârlarını nâse ismâʿ tatrîb-i kulûbe bâdî ve belki tehzîb-i ahlâkı sebeb-i âdîdir. Müşârün-ileyhin fülke-i vücûdu cezîre-i İstanköy'de sâhil-res-i şuhûd ve sinn-i temyîz ve tahkīke baʿde'l-vusûl terk-i bûd u nebûd eyleyerek İstanköy'den kıbletü'l-hâcât olan Âsitâne-i saʿâdet'e müntakil ve tahsîl-i ilme müştagil olup baʿde berhe min-e'z-zemân o esnâda aynü'l-aʿyân olan Hâşim Ali Bey'e kesb-i tereddüd ve intimâ ve devr-i Mahmud Hânîde imâm-ı benâm olan Sarmısakçı-zâde'ye bir müddet kethüdâ olup dest-gîrî-i mahdûm-ı himmet-lüzûm ile mülâzemete nâil ve çok geçmeden tarîk-i kazâya dâhil ve birkaç mansıba tasarruf ile eʿazz-ı maksadına vâsıl olmuşidi. Baʿdehu [Mısraʿ]: قضاة زماننا صاروا لصوصا kaziyyesine tahsîl-i vukūf ve terk-i tarîk-i hüsrân-refîk ile zümre-i avâma luhûk edüp Vezîr Moldovancı Ali Paşa'ya intisâb ve Kütahya vâlisi iken kethüdâlığı şerefin iktisâb ve bundan sonra kethüdâlıkdan maʿzûl ve sipeh-sâlârlığı vaktinde kapucu-başılık ile başbâkī kulluğu mansıbına mevsûl oldukda çok geçmeden paşası münʿazil ve kendisi dahi mansıbından munfasıl olup Silistre mübâyaʿasına me'mûr ve sıdk u istikāmeti elsine-i nâsda mezkûr olduğuna binâen mahfûf-ı avârif-i padişah-ı enâm ve iki tuğ ile bekâm ve az müddetden sonra rütbe-i vezâret (142-b) ihrâziyle vâsıl-ı serhadd-i merâm olmuşidi. Silistre'de vâkiʿ muhârebelerde ibrâz-ı merdânegî vü şecâʿat ve mizâc-ı askerîye vukūfundan nâşî aʿmâllerinde tahsîl-i semt-i suhûlet ve seferlerden sonra Mora muhassıllığı ile mesrûr ve ale't-tevâlî Aydın ve Karaman ve İçel mansıblarına vâli olarak tekmîl-i esbâb-ı huzûr edüp bi'l-âhire Silistre'de ömrü bâliğ-i nisâb-ı difâketü'r-rikāb oldukda terk-i cihân-ı bî-bün- yâd ve azm-i râhat-âbâd-ı meʿâd eyledi. Müşârün-ileyh müşekkel ve mehîb ve mütevâziʿ ve lebîb-i makbûlü's-sîre hasenü's-sûre cesâret ve şecâʿati müsellem ve raʿiyyet-perverlikde akrânı tâlî kendi mukaddem idi. Ancak Nazm: "يدير بالنجوم وليس يدرى / ورب النجم يفعل ما يشاء" meʾâlinden zihni hâlî ve kasd-ı vusûl-i ilm-i mugayyebâta iştigāli mûcib-i resâset-i hâli ve an be-an vesîle-i inkılâb ve ıztırâb-ı bâli olduğundan gayri ikāme-i imâd-ı dînde tekâsülü yaʿnî müdâvemet-i salâtda tesâhülü olmasa recül-i kâmil denmeğe sezâ bir vezîr-i sütûde-râ idi. Ahkâm-ı nücûmiyyeye adem-i iʿtibâr ve te'sîrât-ı kevâkibe kāil olan felâsifenin akvâlini ibtâl ve inkâr ile dâmen-i tevekküle müteşebbisen gerdan-dâde-i irâde-i hazret-i perverdgâr olmak zımnında Tuğrâyî'nin ebyât-ı meşhûresi sihr-i helâl kabîlinden olduğuna binâen işbu mahalle tahrîri münâsib görüldü. Nazm: "تفرد الله بالتدبير ما اشتبكت / فيه نجوم ولا شمس ولا قمر / فكل الى الله ما اعياك مطلبه / فسوف يأتي بما لا تأمل القدر / والخير والشر منه جاريان على / ماشاء لا حيلة تغنى ولا حذر"