(41-b) Akdeniz muhâfazasına me'mûr olan kapudanlardan Ahmed kapudanın râkib olduğu şitye iki yüz yetmişbeş nefer ve kırk kıt'a top ve cemî' levâzım mükemmel ve mevcûd olduğu bundan akdem bi'l-ihbâr ma'lûm-ı devlet-i ebed-istimrâr idi. İşbu mâh-ı Zilhiccenin onikinci târihiyle kapudan-ı merkūmun vezîr-i mükerrem kapudan paşa hazretleri tarafına bir kıt'a mek- tûbu gelüp, mefhûmunda râkib olduğu şitye ile emr-i muhâfazaya sarf-ı iktidâr Meğri ve Litroz beyninde geşt ü güzâr eder iken Malta korsanlarından bir fırkateyne musâdefe edüp bir-iki sâʿat mikdârı muhârebeden sonra râkib olduğu şitye cemîʿ mühimmâtıyla giriftâr-i dest-i aʿdâ ve kendisi dahi kayd-i esre mübtelâ olduğun inbâ edüp kapudan-ı merkūmun râkib olduğu sefîne neferât ile meşhûn ve edevâtı mütekessir ve efzûn iken adîli olan bir kâfir sefînesine mağlûb olması zâhir-i hâle nazaran ve esbâba iʿtibâren ya neferâtı noksan veyâhûd mühimmât ve barutu telef-şüde-i dest-i gāret-gerân olduğu muhtâc-ı beyân değildir. "Vezâlike takdîrü'l-ʿazîzi'l-ʿalîm" Zikr olunan kaziyye ʿatebe-i ülyâ-yı hazret-i tâcdârîye savb-ı âsaf-ı gayret-medârdan arz olundukda sefîne-i mezkûrenin bi-eyyi-vechin-kân tahlîsi ile tekmîl-i ırz-ı devlet ve siyânet-i nâmûs-ı saltanat kılınmak bâbında hatt-ı hümâyûn-ı hikem-meşhûn şeref-sudûr olup sadrıazam hazretleri Donanma-yı hümâyûn'un malzemelerini bi'n-nefs muʿâyene kasdiyle Tersâne-i âmire'ye tebdîl-hey'et teşrîf buyurduklarında kapudan paşa hazretlerini azîm muʿâheze (42-a) buyurup Malta ve sâ'ir harbî gemilerinden Devlet-i aliyye sularını muhâfaza zımnında mikdâr-ı kâfi tertîb olunan bergandi ve firkatelere beher sene cânib-i mîrîden katı çok sâlyâneler iʿtâ olunur iken sefâ'in-i merkūmeyi yerli-yerinde adem-i istihdâm ile Devlet-i aliyye'ye mûris-i nakīsa-i şân olacak hâlete illet olmak nîk-nâmî ve gayret şurûtuna muvâfık mıdır? buyurduklarında kapudan paşa hazretleri bu sene-i mübârekede hasbe'l-iktizâ Akdeniz'e çıkmadığını ve Donanma-yı hümâyûn sefînelerinin nakl-i mühimmât içün etrâfa me'mûriyetlerini beyân ile bast-ı aʿzâr eyledikde taraf-ı hazret-i sadrıazamîden mukābele ve «geçen sene cenâbınız Donanma-yı hümâyûn ile Akdeniz'e çıkmış iken bir kıtʿa Arnavud ve bir kıtʿa hacı gemisi zabt-kerde-i düşmen-i dîn olduğu maʿlûmunuzdur» buyurduklarında müşârün-ileyh mebhût ve iʿtirâf ile mühr-zen-i leb-i sükût oldukda taraf-ı sadâret-penâhîden nass-ı hatt-ı hümâyûn müşârün-ileyh hazretlerine ifhâm ve sefîne-i mezkûrenin bir çâresi görülmek zımnında sevk-i kelâm olunup şimdilik Bahr-i sefîd'e ihrâc olunacak iki kıtʿa kalyonların asker ve takımlarını bâligan-mâ belag techîz ve yanlarına neferât ve topları mükemmel iki kıtʿa kırlangıç terfîk ve serîʿan tisyâr ve şityeyi alan korsan-ı melʿûnu taharrî ve avn-i Hakk ile ele getirmelerini kapudanlara tenbîh ve laʿîn-i mesfûr ele girmediği sûretde kudûm-ı nev-baharda Hakk teʿâlâ mevâniʿden hifz eylediği hâlde Donanma-yı hümâyûn ile Akdeniz'e çıkup Malta sularına dek varup bi-tevfîkillâhi teʿâlâ ahz-i intikāma bezl-i mechûd ve iktidâr edeceğini taʿahhüd ve ahz olunan şityeden üç (42-b) gün mukaddem müfârakat ve alâ-rivâyetin görüp âr-ı firârı mürtekib olan Çulbak-oğlu'nun râkib olduğu fırkateyni cânib-i mîrîye zabt olunup kendisi Magosa kal'asına kal'a-bend olmak bâbında dest-bâz-ı niyâz u mes'elet olmağla istidʿâsı müsâʿadeye makrûn ve mezkûr Magosa'da mescûn ve fırkateyni cânib-i mîrîye zabt olunmağla terhîb-i kulûb-ı aʿlâ vü dûn kılındı. (142-a)