Tehniyet-i îd-i sa'îd ve dâmen-bûsî-i şehriyâr-ı bâhirü'n-nasr ve't-te'yîd zımnında vezîriazam hazretleriyle ve şeyhülislâm hazretleri ve Âsitâne-i sa'âdet'de el-yevm mevcûd olan vüzerâ-yı 'izâmdan Kapudan-ı deryâ Gāzî Hasan Paşa ve Karesi sancağına ber-vech-i arpalık mutasarrıf olan Esseyyid Mustafa Paşa ve hazîne kethüdâlığından bu def'a nâ'il-i rütbe-i vezâret ve pâ-der-rikâb-ı azîmet olan İsmail Paşa hazerâtı ve sâ'ir vükelâ-yı devlet ve erkân-ı saltanat mutâd üzere salât-ı subhdan evvel Saray-ı hümâyûn'a cem' olup alâ-merâtibihim âstîn-bûs-i hazret-i zıllu'l-lâhî ruhsatiyle müstes'id ve kâmyâb ve müşâhede-i cemâl-i bâ-kemâl-i hilâfet-penâhîyle îd-i ekber şerefin iktisâb eylediklerinden sonra hidîv-i Cem-câh ve pâdişâh-ı dil-âgâh dâme fî-hifzi'l-İlâh hazretleri îd-i şerîfe mahsûs olan debdebe-i hüsrevâne ve tantana-i pâdişâhâneleriyle nev-bâvegân-ı hadîka-i devlet ve nev-restegân-ı bâğ-ı saltanat olan Sultan Süleyman ve Sultan Mustafa hazerâtını mânend-i fevz ü nusret der-kafa ve yemîn ü yesârda saf beste-i kıyâm olan hass u âmdan isticlâb-ı du'â buyurarak Sultan Ahmed Câmi'-i şerîfine teşrîf ve salât-ı îdi edâ ve ba'dehû Saray-ı hümâyûn'da i'dâd ve amâde kılınan dahâyâyı ser-i devlet-efserlerine fedâ buyurdular.