Rûznâmçe-i evvel (40-a) olan Mehmed Saîd Efendi bir müddetden berü derd-i cân-hırâş ile esîr-i firâş ve muʿâlecât-ı etibbâ kendüye vesîle-i intiʿâş olmayup işbu mâh-ı Zilhiccenin altıncı günü rûznâmçe-i ömrü tayy-kerde-i dest-i ecel ve dâr-ı âhirete intikāl ile terk-i mâ-hasal edüp mahlûl olan mansıbı ile muhâsebe-i evvel Bekir Paşa-zâde Süleyman Bey-efendi mesrûr ve muhâsebe-i evvel mansıbiyle re'isülküttâb-ı esbak Süleyman Feyzi Efendi nâil-i ibtihâc ve hubûr olup muharrir-i fakîr dahi yevm-i mezkûrda zabt-ı vekāyiʿ-i Devlet-i aliyye'ye me'mûr olmuşdur. Tercüme: Mûmâ-ileyh Mehmed Saîd Efendi devr-i hazret-i Mahmud Hânîde Darü's-saʿâdetü'ş-şerîfe ağası kâtibi iken dâhil-i zümre-i hâcegân-ı dîvân olan İsmail Efendi'nin ferzend-i ercümendi olup bin yüz yirmialtı tarihinde tayy-i menâzil-i adem ve sahn-ı vücûda vazʿ-ı kadem edüp fark-ı sevâd ve beyaz ve temyîz-i cevâhir ve aʿrâza kādir oldukda mektûbî-i sadr-ı âlî kalemine me'mûr ve tahrîr-i mühimme ile taklîb-i sahâif-i aʿvâm ve şuhûr eder iken ünfüvân-ı şebâb iktizâsiyle meyl-i geşt ü güzâr ve kapucular kethüdâlığından nâil-i rütbe-i vezâret olan Selânikli Esseyyid Numan Paşa'nın dîvân kitâbeti hizmetiyle kâm-kâr olup bir müddetden sonra Asitâne-i saʿâdet'e avd ü kufûl ve ihtiyâr-ı gûşe-i uzlet ve humûl ve altmış dokuz senesinde kethüdâlıkdan ihrâz-ı câh-ı vezâret eden Kâmil Ahmed Paşa merhûma bir zamân dîvân kâtibi ve kethüdâ ve Mısır'da darbhâne emânetinde istihdâm ile ibrîz-i iʿtibârı sikke-zede-i iʿtilâ olmuş idi. Yetmişbeş senesinde paşası (40-b) tarafından bir husûs zımnında Asitâne-i saʿâdet'e vurûdunda dâmâdı olan Hafız Ahmed Ağa silâhdâr-ı şehriyârî bulunup hakkında tahrîk-i silsile-i işfâk ve masraf kitâbetiyle zümre-i hâcegâna ilhâk ve baʿdehu darbhânede sâhib-i aʿyâr ve seferler esnâsında rikâb-ı kamer-tâbda çavuşbaşılık câhiyle nâil-i izz ü iʿtibâr ve baʿde-zamân bu hizmetden dahi infisâl ve Ebuzzeheb vaktinde nizâm-ı mısr-ı Kahire'ye dâir evâmir-i aliyye ile bâdbân-küşâ-yi istiʿcâl oldukda Bahr-i sefîd'de geşt ü güzâr eden Moskovlu sefâinine tesâdüf ve cânib-i Mısır'a azîmetinden insirâf ile Sakız cezîresine ihrâc olunup Asitâne'ye avdet ve mükerreren rikâb-ı hümâyûn çavuş-başılığı ile kesb-i şân u şöhret etmişidi. Baʿdehû bi'l-asâle üç defa hizmet-i mezkûrede müstahdem ve Anadolu muhâsebeciliği ve rûznâmçe-i evvel ve mukā- bele-i suvârî ve tevkî'i menâsıbiyle tırâz-ı câhı mu'lem olup bu kerre sâniyen rûznâmçe-i evvel iken zâ'ik-i telhabe-i reybü'l-münûn ve Bahçe-kapısı'nda vâki' Vânî medresesinde medfûn olmuşdur. Mûmâ-ileyh âkıbet-endîş ve perhîzkâr ve mizâc-ı asrı bilür hûşyâr olup ma'ârif ve hünerden oldukca behrever ve ahlâk-ı mühezzebe ile şühre-i şehr olduğundan gayri me'mûr olduğu hidemâtda kemâl-i ihtiyât ve teyakkuzu zâtına isnâd-ı rehâvet ve fütûru îcâb ve her maddede وحاذر الناس واحسبهم على دخل me'âliyle berçîde-dâmen-i ihtirâz ve ictinâb idi. Ömr-i girân-kadrden derece-i mu'tedileyi hâ'iz ve sinni rütbe-i seb'îni mütecâviz idi. (41-a) تجاوز الله عن سيئاته