Şâm vâlîsi iken bundan akdem hulûl-i ecel-i mef'ûdiyle vefât eden Azm-zâde Vezîr Mehmed Paşa'nın müddet-i medîdeden berü bi'l-cümle diyâr-ı Şâm kabz-kerde-i dest-i tasarruf ve iğtinâmı olmakdan nâşî mâlik-i ye- sâr u servet ve nâ'il-i bülgā-ı kuvvet ve miknet olmağla kabz-ı muhallefâtına sâbıkā başbâkī kulu Osman Ağa taʿyîn ve hademe-i Devlet-i aliyye'den birkaç kimesne irfâkıyla mâdde-i me'mûriyyeti teshîl ve tehvîn kılınmışidi. Şâm'a vusûllerinde dest-res oldukları mâl tasavvur olunduğuna nisbetle bî-me'âl ve belki cemelden ıķāl olduğu tahakkuk eyledikde tahsîl-i emvâl-i mîriyyede mişvârı maʿlûm bir kimesnenin fî-mâ-baʿd me'mûriyyeti lâzım geldiği ecilden mukaddemâ Rişvân-zâde tarafına akçe tahsîli zımnında me'mûr olup emr-i tahsîlde mücerrebü'l-etvâr olan Dergâh-ı âlî kapucubaşılarından Tayfûr Bey dahi husûs-ı mezkûre me'mûren Şâm'a vusûlünde ihrâc-ı emvâl-i mektûme ve teftîş-i mahall-i maznûne ve mevhûmede tehdîdât-ı sâbıkasın îkāʿ eyledikde an-asıl ahâlî-i Şâm'ın ekserîsi müteveffâ-yı müşârün-ileyhin müteʿallikātı ve memâlikinin küllîsi yerli neferâtı olduğuna binâen mücerred ketm-i emvâle medâr olmak üzere yek-diğer ile ittihâd ve mübâşirler olduğu mahallere hücûm ile mübâşir-i bağy ve fesâd oldukları (38-b) sâmiʿa-hirâş-ı Devlet-i ebed-müddet oldukda evâsıt-ı Zilkaʿdede Haleb vâlîsi vezîr-i mükerrem Mustafa Paşa hazretlerine der-akab fermân-ı kezâ cereyân şeref-sudûr ve kethüdâsını altı yüz nefer mikdârı âdem ile Şâm'a taʿyîn ve me'mûr edüp bâʿis-i tuğyân olan eşhâsı muktezâ-yı vakt ü hâle göre te'dîb ve ihzârları irâde buyurulan kimesneleri bir kadem akdem Âsitâne'ye îsâl ve tesrîb etmesi bâbında te'kîd ve sâlifü'z-zikr Tayfûr Bey'e dahi Sayda vâlîsi Cezzâr Ahmed Paşa hazretleri nizâm-ı vilâyete me'mûr olacakdır havâdisini ol tarafda neşr etmek üzere taraf-ı devletden telkîn olunmuşdur.