Sâbıkā Üsküdar kadısı olan Subhî-zâde Abdülazîz Efendi bundan akdem dest-i sâkî-i rûzgârdan tenâvül-i ke's-i ikbâl ve nabz-gîri-i hazâkat-i baht ile teşhîs-i illet-i âmâl edüp tabiʿat-i buhrân-dîde-i makāsıdı ifrâk-yâfte-i kemâl ve ahlât-ı müstehîletü'l-indifâʿ maʿaribi vâsıl-ı merâtib-i sükûn ü iʿtidâl olduğundan fazla sübûr-ı ümîd ve arzûsu yâverî-i azmîde ve kemâdât-ı tâliʿ ile mündemil ve devâ-i bür'i's-sâʿa-i cedd-i müsâʿid ile ilel-i ye's ü hırmânı zâil olup hasret-keş-i gürûh-ı etibbâ olan hekîm-başılık hizmet-i refîʿiyle az zamanda nâil-i emânî ve defʿ-i humâr-ı ayş-i münekkede iʿdâd-ı şarâb-ı rummânî eyledikde Beyt: "İnne'ş-şebâbe ve'l-ferâğa ve'l-cedete mefsedetün li'l-mer'i eyye mefsedetin" mefhûmu üzere nabazân-ı şerâyîn-i fesâdı azline sebeb-i âdî ve heyecân-ı çar-terkîb-i sû-i mizâcı bu mansıbdan define bâdî olup baʿde zamânin bi-hasebi't-tarîk Üsküdar'a kadı ve hîn-i hükûmetinde halkın kimi kendüden şâkî ve kimi hoşnûd ve râzî idi. İnkızâ-i müddetinden sonra "el-belâ'ü müvevvekelün bi'l-mantıkı" mefhûmu üzere lisânını imsâk her hâlde bâʿis-i selâmeti olduğunu idrâk etmek lâzım iken iltizâm-ı mâ-lâ-yelzem sûretinde haddini tecâvüz ve taʿaddî ve erkân-ı saltanat-ı seniyyeden baʿzıları hakkında kelimât-ı nâ-ber-câya tasaddî edüp baʿzı mahallere tezkireler tahrîr ve umûr-ı müttefika-i Devlet-i aliyye'ye harf-endâz-ı iʿtirâz olarak kâr-fermâyân-ı devleti tahti'e ve taʿyîr etmesi nefyini müeddî (38-a) olmağla sene-i mezkûre evâil-i Şevvâlinde mansıbı vakti hulûlüne dek bâ-işâret-i aliyye sâdır olan emr-i âlî mücebince cezîre-i İstanköy'e nefy ü iclâ ve adem-i keff-i lisân-ı seyyi'esi hakkında hüküm ve muktezâsını icrâ etmiştir.