İngiltere elçisi Devlet-i aliyye'ye «devletim tarafından ba'zı husûs ifâdesiyçün me'mûriyetim vardır» diyerek Bâb-ı âlî'ye bir kıt'a takrîr takdîm ve re'îs efendi ile mülâkāt tasmîm eylediği bâ-takrîr rikâb-ı kâmyâb-ı hüsrevâneye arz u tefhîm olundukda izn-i hümâyûn erzânî buyurulup işbu doksanyedi senesi mâh-ı Zilka'de'nin yirmialtıncı perşenbe günü efendi-i mûmâ-ileyhin Ayazma'da vâki' olan sâhil-hânesinde İngiltere elçisi ile mülâkāt olundukda elçi-i mersûm Rusyalu ile Nemçelü'nün ittihâdından bahs ve tâ'ifeteyn-i mesfûreteyn ile muhârebe vakt ü hâle nazaran münâsib olmadığını inhâ ve İngiltere Devleti Devlet-i aliyye-i ebediyyü'l-karârın sadâkatkâr dostu olmağla bi't-tavassut ıslâh-ı cânibeyn irâdesinde olduğun inbâ ve tarafeynden serhadlere mütekārib olan mahallerde i'dâd-ı udde ve atâd ve cem'-i asâkir ve ecnâd lâ-büdd mûcib-i nizâ' ve fesâd olacağın îmâ eyledikde, re'îs efendi tarafından mukābele olunup «Devlet-i aliyye'nin bu tedârükâtı fesh-i sulh kasdına mebnî olmayup hem-civârlarının tedârüklerini müşâhede etmekle ihtiyâten hifz-ı sugür ve serhâddâta bezl-i makdûr etmişdir» diyerek vech-i tavassut ve derece-i ruhsatları istihbâr olundukda Kırım hıttasından Devlet-i aliyye ferâgat ve sâ'ir mevâdd Aynalı-kavak tenkīh-nâmesine tatbîk ile tanzîm ve rü'yet olunmak üzere tavassut eylediklerini ifâde eyledikde sûret-i tavassutları evliyâ-yı na'mâ hazerâtına arz u takdîm ve ne vechile irâde-i sâmiyeleri ta'alluk eder ise meclis-i diğerde kendüye tefhîm olunacağı ve Devlet-i aliyye'nin dost-ı kadîmi ve bu makūle mevâdd-ı (27-b) lâzımede sadâkati samîmî olan França Devleti'nin dahi tavassut emrinde iştirâkleri lâzım idüğü ihbâr olundukda Françalu'nun tavassutda iştirâklerini «devletim kabûl edeceği meczûm, ancak Rusyalu'nun râzı olacakları nâ-ma'lûm olup Devlet-i aliyye'nin bu bâbda verecekleri cevâb ile iştirâk-i tavassut maddesi devletim tarafına tahrîr olunur» deyü hatm-ı kelâm ve meclis bu vechile itmâm olundu. İngilterelü'nün sûret-i tavassutu münfehim oldukda beher hâl elçiye bir cevâb verilmek iktizâ etmekle Devlet-i aliyye ahdinde pây-dâr ve Kaynarca ve Aynalı-kavak musâlâhaları şurûtunun vikāyesiyle emr-i tavassutları makbûl-i devlet-i ebed-karâr olduğu cevâbı elçiye iş'âr ve işbu mükâleme-i âtiyede vezîr-i mükerrem kapudan paşa hazretlerinin refâkati dahi hâtır-güzâr olduğuna binâen işbu şehr-i Zilhicce'nin üçüncü perşenbe günü müşârün-ileyh hazretleriyle re'îsülküttâb efendi Aynalı-kavak sâhil-sarayında ictimâ' ve âfâkī ba'zı sohbet akabinde taraf-ı devlet-i ebed-şevketden karârgîr-i istihsân olan cevâb elçi-i mersûma ismâ' olunup elçi-i mersûm «Rus- yalu Kırım'ı zabt etmiş bulunmalariyle tekrâr reddi ve sûret-i ûlâya tahvîli mümkin olmayup gāyeten mâ-fî'l-bâb Devlet-i aliyye'nin irâdesi devletim tarafına tahrîr olunup, sa'y ü gayretde kusûr olunmayacağı bî-irtiyâb ve França Devleti'nin emr-i tavassutları matlûb-ı devlet-i ebed-müddet olup tervîci husûsunda dahi zerreten-mâ tuvânî ve fütûr irtikâb olunmaz» deyu cevâb etmekle işbu meclis dahi bu vechile hitâm bulup İngiltere tarafından vürûd-ı habere intizâren madde-i Kırım şimdilik bu hâl üzere mevkūf kalmışdır.