Bu esnâda İsmâʿîl seraskeri vezîr-i mükerrem Abdî Paşa hazretlerinden ve Akkerman ve Yanık-kalʿa muhâfızı İsmâʿîl Paşa'dan tahrîrât vürûd ve me'allerinden Kırım'da kalan sultanlardan müteveffâ Arslan Giray Hân'ın oğlu Gazi Giray Kırım'dan hurûc ve sefîne ile Bucağ'a vülûc edüp mahall-i mezbûrda vâki' Baht Giray Sultan'ın çiftliğine misâfereten nüzûl eylediği ve Şahin Giray el-an Moskovlu ile müttehid ve Abaza ve Çerakise üzerine hücûm içün Rusya tarafından gelen askere müterakkıb ve müterassıd olduğunu sultan-ı mûmâ-ileyhin hazînedârı takrîr etdiği iş'âr olunmağla sultân-ı mûmâ-ileyhi olduğu mahalden serîʿan kaldırup Rumeli tarafında olan ebnâ-yi cinsi yanlarına îsâl etmesi bâbında Abdi Paşa hazretlerine hitâben fermân-ı âlî ısdâr olundu. Mukaddemâ Soğucak ve Abaza ve Çerakise taraflarına takviyet verilüp top ve cebehâne ve mühimmât-ı sâire ve asâkir irsâlinde vâki' olan himmet-i evliyâ-yi devlet (22-a) tamâmca dûr-endîşlik ve âkıbet-bînlik rüsumunu icrâ kabîlinden olup riʿâyet-i lâzıme-i hazm ü ihtiyât ancak bu kadar olabilir. Cenâb-ı Hakk her hâlde Devlet-i aliyye'yi te'yîdât-ı rabbaniyyesiyle mansûr ve a'dâ-yi dîn ü devleti eyne-mâ kânû müdemmer ve makhûr eyleye, âmîn.