Evvelâ: Me'kûlât ve mühimmât-ı sefâin ve hâsılât-ı sâirenin Devlet-i aliyye memâlikinden mürûr ve nakl olunmalarına ba'd-ezîn mevâni' îrâs olunmaya ve ticâret sefâininin serbestiyyet üzere seyr etmelerine dâir iki devlet-i imparatoriyyeden ve ekser Avrupa milelinden i'tirâf ve tasdîk olunan bî-taraflığın nizâmı usûlüne muvâfık nizâmât tanzîm oluna ve işbu madde Rusya (11-b) devlet-i imparatoriyyenin muvâfakat etmiş olduğu ri'âyât-ı hâtıra nazaran mevâdd-ı elzemeden olmağla değme hâl ile ferâgat olunamaz ve işbu madde alâ-eyy-i-hâlin onsuz olmaz kabîlinden bir şart edecekdir. Sâniyen: Devlet-i aliyye min-ba'd hufyeten ve alâniyeten umûr-ı Tatar'a müdâhale etmeğe ve hânı gayri gûne görmeyüp ancak bir melik-i müstakil ve serbest olduğuna nazaran bir türlü mahkûmu olmadığını ve bir gûne kendüye verecek hesâbı olmadığını bilüp binâberîn aleyhine bir türlü şikâyâtı ve bâ-husûs elhâletü-hâzihi mâ-nahnü-fîh olanlar külliyen kizbe mebnî olup kurb-i civâriyyetine dahi min-külli'l-vücûh râci' olmadıklarından kabûl etmeye. Sâlisen: Eflâk ve Boğdan memleketleri hakkında bin yediyüz yetmiş dört senesi musâlâhası muktezâsı üzere muʿâmele olunup bu bâbda her türlü mühimmâtı ber-taraf etmek içün baʿd-ezîn verecekleri cizyeye ve hilâf-ı kāʿide cebren ihdâs olunan ahmâlin refʿine dâir müzâkere oluna.