Cezîre-i mezkûrenin an-asl dahl ü harc ve tekâlîfe dâir umûrları kocabaşıları ma'rifetiyle rüyet olunur iken, seferler takrîbi ile Arnabud tâifesinden cemm-i gafîr cezîre-i mezkûrede karâr-gîr ve a'sâb u urûk-ı reʿâyâya dem-i fâsid gibi hulûl ve murâbaha ve selem tarîki üzere mezbûrlara akçe verüp hadd-i i'tidâlden hâric ribh ü nümâ-yi fâhişin edâsı mümkün olmayacak derecelere mevsûl olup bu bâr-ı girâna reʿâyâ mütehammil olmadığından fursat-yâb-ı hezîmet olanlar tahlîs-i cân ve olmayanlar rûzân u şebân ve o makūle bî-insâf tâifenin zîr-i şikencesinde nâlân olup Mora vâlîleri nizâm-ı beldeden meyûs ve belki eyâdî-i batşelerinde mahbûs ve bu sûrette hâricden bir vezîr-i (99b) celâdet-semîrin ta'yînini kâr-şinâsân-ı devlet istihsân ve kapudan paşanın memûriyetini herkes âverde-i zebân-ı beyân eylediğine binâen husûs-ı mezkûr müşârünileyhin gerden-himmetine ta'lîk ve maʿiyetine o havâliye karîb mahallerden vâfir kimse terfîk kılınmışidi. Müşârünileyh birkaç gün zarfında levâzımât-ı berriyesini itmâm ve o tarafa tahrîk-i licâm-ı iʿtizâm eyledi. Garîbe: Kapudan paşa kurb-i saltanattan çend merhale dûr olduktan sonra tevkīʿi olan Vezîr Mustafa Paşa'ya kapudanlık ve kapudan paşaya Mora muhassıllığı tevcîh olunmak bâbında bir kıtʿa hatt-ı hümâyûn sudûr edüp, re'îs efendi sadrıazama hitâb ve "bu kulunuz kapudan paşayı zulmü içün sevmem ve himâye etmem, lâkin nâm u şânı deryâ kapudanlığıyla iktisâb edüp öyle bir cesîm hidmete taʿyîn olunmuşiken azli intifâ-yı nüfûzuna illet ve vardığı mahalde me'mûl-i devlet üzere hidmet göremiyeceği zâhirdir" dedikte, sadrıazam cevâba ağâz ve "silâhdâr ağa bu maddenin husûlünü niyâz edüp muhâlefette hücnet ve beyân ettiğiniz mahzûr dahi vârid olup, bunda tedbîr nedir?" dedikte, "filân madde şeyhülislâm efendi ile müzâkere olunacaktır. Bu hücnet müşârünileyhe beyân olunarak defʿ-i esbâbına teşebbüs ve taraflarından silâhdâr ağaya bir tezkere yazdırılup, şimdiki hâlde bu madde taʿcîl olunmayup müşârünileyhin hitâm-ı memûriyetine te'hîr münâsibdir, dedirmek mümkündür” dedikte sadrıazam efendi "Allah râzı olsun taʿbîriyle rahîbü's-sadr ve münşerihü'l-kalb olup maddeyi semâʿan tashîh eylediklerini îmâ ile “tezkereyi tahrîr buyursunlar" deyü tenbîh (100a) ve te'kîd ve efendi-i mûmâileyh dahi taraf-ı fetvâ-penâhîye tafsîl-i hâl ve beyân olunduğu vechile tezkire tahsîl ve irsâl ve kelâmında olan nüfûz-ı tertîb-i mezkûru ibtâl eylediğini merhûm lisânen takrîr ve bi'l-istidrâd bu mahalle kayd u tahrîr olundu.