Tersâne Emîni Süleyman Feyzi Efendi maʿrifetiyle inşâ olunan sandal ve fülke-i hümâyûn resîde-i mevkıʿ-i hitâm olduğu Bâbıâlî'ye ifhâm ve kudûmları muʿtâd olan zevât hâzır oldukları hâlde (98b) duʿâ-yi bekā-yi eyyâm-ı saltanat tertîl ve zikr olunan fülke ve sandal deryâya tenzîl olundu. Maraş etrâfında iskân olunan aşâir hadlerini tecâvüz ile müştehir ve etrâf ve eknâf nehb ü gāret misüllü evzâʿlarından mütekeddir olduklarından dâire-i hadd ü edebe idhâlleri bir vezîr-i dilîre ihâle olunmak tedbîr olunup, Adana Vâlîsi Vezîr Hazinedar Ali Paşa bu maslahatın İbn Becde'si olduğuna binâen Maraş Eyâleti ber-vech-i ilhak tarafına tevcîh ve o makūle muzırr-ı ibâd olan eclâf-ı aşâirin icrâ-yi tedîb-i mâ-yelikleri tenbîh oldu. Vezîr, Mîrâhur Mustafa Paşa birâder-zâdesi olup bir müddetten berü yazıcılık hidmetiyle bekâm ve hüsn-i hulk u reftârı pesendîde-i hâss u âm olan Mehmed Bey hakkında mühr-i âtıf-ı şâhâne bâhirü'l-işrâk ve baş muhâsebe pâyesiyle tarîk-i hâcegâna ilhâk ve hilâf-ı âde semmûr kürk ile kadr ü iʿtibârı ziyâde kılındığından fazla yazıcılık hidmet-i şerîfesi dahi ibkā ve bu avâtıf-ı mütetâbiü'z-zuhûr ile mahsûd-ı emsâl ü ekfâ kılındı. Dağistanî Ali Paşa târih-i mezbûrda Karaman Eyâleti'ne şâyân görülüp, selefi Vidin muhâfazasına taʿyîn ve sâbıka Kars muhâfızı Vezîr Esseyyid İbrâhîm Paşa Rakka Eyâleti'nde temkîn olunup, Kars muhâfazası mîr-i mîrândan Abaza Paşazâde Mehmed Paşa'ya ihâle ve riyâz-ı emânîsine cûybâr-ı mekârim-i şâhâne isâle olundu. Bir zaman mülk-i İrân'da Vekâlet Şah (99a) ünvâniyle Dürre-yi zen tabl nâm u şân olan Zend Kerîm bir müddet alîl ve sakīm olup bu esnâda vefât ve azm-i arasât eylediği Bağdad Vâlîsi Hasan Paşa tarafından iş'âr ve Basra Eyâleti'nin zabtı bâbında filhâl tarafına emr-i müekked ısdâr olundu. Hân-ı mezbûr mütefekkir-i avâkıb-ı umûr-ı siyâset-i mülkiyede yegâne ve hiyel-i akliyede müfred-i zemâne olup ancak rafz ve ilhâd u fesâd-ı i'tikād ile şöhret-gîr ve gadr ü cevr ile hâtır-şiken-i bernâ ve pîr olup aʿdâd-ı eyyâm-ı zindegânîsinde kesret ve dâire-i ömründe vüs'at olsa idi tevsîʿ-i mülk sevdâsiyle mücâvirlerine hayli zahmet vereceği müteyakkın idi. Binâen-alâ-zâlik vücûd-ı bed-bûdunun zevâli sebeb-i râhat-ı âlem ve bâʿis-i efzâyiş-i âsâyiş-i ümem olmuştur.