Şehr-i Rebîülâhir'in evâilinde Nahl-bend Mahallesi'ne müsâmit Arabacılar Kârhânesi kurbinden nâ-gâh bir ateş-i ser-keş-inân asmâne peyveste ve o havâlide olanları hayrân ve dem-beste edüp tarafetü'l-aynda Arabacılar ve Tavukçular kârhânelerini ihrâk ve binden mütecâviz sagīr ve kebir hâneleri ifnâ ile sâhiblerinin âh u enînlerin vâsıl-ı küngüre-i çarhına tâk edüp birkaç saat bu hâl-i pür-melâl takarrür ve zuhûr-ı inâyet-i Hakk ile o belâ-yi âsmânî ve kazâ-yi nâ-gehânî zâil olup garâmet-i mâliye ve mülkiyeden vâreste olanlar secde ber-endâz-ı mihrâb teşekkür oldular. Yine bu târihte seyr-i bâğ ü râğ eden küstâhlardan biri Kavak Sarayı'nda kadh-i zinâd ve hâsıl olan şerâresi ihrâka müstaʿid baʿzı şeye mülâmese ile bi't-tedrîc harem tarafını îkād ve itfâsına memûr olanların saʿyi, müfîd olmayup o câ-yi dil-keş tesîr-i âteş ile beraber hâkister oldu.