Kemâl-i takarrüb ile taraf-ı padişahîye temahhud ve ihtisâs kesb eden silahdâr-ı hazret-i tâcdârî Mehmed Ağa birkaç defa efendi-i mûmâileyhi sırren ihzâr ve akl ü rüşdünü tecrübe ve ihtibâr edüp لسان المرء ترجمان عقله mefhûmu üzere zebân-âver-i beyân olduğu tedbîrâtı kabûl ve teslîm ve Aynalıkavak Tenkîh-nâmesi hitâmında riyâset hakkında tasmîm olunduğu sûret-i tebşîrde tefhîm etmişidi. Maddeler ber-vefk-i memûl tenkih ve hüsnünü herkes iʿlân ve tasrîh eylediklerine binâen hakkında sebkat eden vaʿd-i cemil incâz ve şehr-i Rebîülâhir'in onbirinci günü mûmâileyh (98a) câh-ı refîʿ-i riyâsetle mümtâz kılınup selefi Atıfzâde Ömer Vahîd Efendi hânesinde ikāmet ve meşgûl-i duʿâ-yi devâm-ı devlet oldu. بشرى لقد صار الرئيس ابن الرئيس Zâde-i-tabʿ-ı fakīr olarak riyâsetlerine nâm-ı tarihdir: إن عبد الرزاق اشرق فهما بدر تم قد نار بالعلم اوحد Bekrîzâde'nin dahi altı vech ile istihrâc olunan târihidir.