Serbestiyet maddesinin istikrârı zımnında bâlâdan zîre gelince vâkiʿ olan ahvâl, mahalleri geldikçe tafsîl ve icmâl olunup Râif İsmâil Bey ve Âtıfzâde Ömer Vâhid Efendi'nin riyâsetleri hengâmmda bu ihtilâlin indifâʿı mümkün olmayup Devlet-i aliyye bahren ve berren tedârike mecbûr ve ceng kapuların açmakta maʿzûr olup, ancak Rusyalu Taman Kalesini Devlet-i aliyye tahliye etmeyüp Devlet Giray'ı dahi hilâf-ı şurût han nasb ettiler-zuʿmuna zâhib olup mukābele bi'l-misl daʿvâsını pîş-nihâd ve Kırım'a duhûllerini bu sebebe istinâd ve hâl böyle iken yine safvetten hâlî olmadıklarını beyân ve îrâd eylediklerine binâen sâbıka ordu kādısı Müftîzâde Ahmed Efendi ve Reisülküttâb-ı esbak Elhâc Abdürrezzak Efendi ve İbrâhim Münib Efendi Rusya elçisiyle birkaç meclis-i mülâkāt ve takdîr-i Rabbânî ile defʿ-i muhâsamât ve husûl-i terâzî ve musâfât mümkün olmayup bilâhire fenn-i muhâverede yektâ ve bu maddelerin cümlesine âşinâ (97a) olan Abdürrezzak Efendi Der-i aliyye'de mukîm França elçisi tavassutiyle münferiden mükâlemeye taʿyîn olunup Aynalıkavak'da Rusya murahhası ile tenkîh-i mevadd-ı musâlahaya mübâşeret ve birkaç defʿa ictimâʿ ile defʿ-i münâferet-i tarafeyne ikdâm ve gayret ve bilâhire Özi kurâ merʿaları taraf-ı saltanata redd ve Rusya askeri doksan güne dek hıtta-i Kırım'dan çıkup memleketlerine rahl-i azîmeti şedd ve Tatar'ın küllî ve cüz'î umûruna adem-i müdâhale ile nasb-ı hân ihtiyârlarına terk ve bu bâbda lâzım gelen menşûr ve umûr-ı şerʿiyyelerini icrâ içün mürâsele-i şerʿiyye taraf-ı saltanattan gönderilmek şurûtuna nizâm ve meclislere hitâm verilüp istikrâr bulan mevadd Muharremülharâm evâsıtında ʿakd olununan meclis-i meşverette bast u taʿdâd olunup huzzârın cümlesi tenkîhât-ı mezkûreyi tahsîn ve efendi-i mûmâileyhi sezâvâr-ı sad-âferîn etmeleriyle evvel ve âhir vukūʿ bulan keyfiyet bi-tefâsilihâ maʿrûz-ı atebe-i şehryâr-ı İskender-heybet kılınup defʿ-i nizâʿ ve husûl-i âsâyiş ve ittisâʿ-ı tabʿ-ı hümâyûna tevâfuk eylediğinden senedler mübâdelesi fermân ve bi-hasebi'l-me'mûriye işbu Rebîülevvel'in dördüncü Pazar günü mübâdele-i senedât ile itfâ-yi nâr-sûzân ve ferdâsı efendi-i mûmâileyh kapuya gelüp aʿlâ bir semmur kürk ilbâsiyle mazhar-ı izz ü şân kılındığından gayri mükâleme kâtibi Beylikçi Esseyyid Mehmed Hayri Efendi'ye ve dîvân tercümânına dahi birer semmur kürk giydirilüp birer gün tefâvüt ile ibtidâ Rusya elçisine ve sâniyen França elçisine dahi huzûr-ı sadâret-penâhîde birer (97b) sevb-i semmur iksâ ve bu ahbâr-ı sârre serhadlerde vâkiʿ vülât ve hükkâma tahrîr ve inhâ olundu. Tezyîl: Harb tahakkuku ihtimâliyle henüz tâze cân bulmuş reʿâyâ müceddeden tekâlîf-i seferiyeye mübtelâ olup hudûd u sügūra dahi celb-i asâkir ve tertîb-i zehâir olunup baʿzısı taʿcîl ve baʿzısı tecîl olunmuşidi. Fazl-ı hakk ile ıslâh-ı zâtü'l-beyn keyfiyatı tebeyyün ve indifâʿ-i şûriş ve ihtilâl hâletleri taʿayyün edüp fukarâ ve zuʿafânın bâr-girân-ı tekâliften âsûde olması murâd-ı hümâyûn olduğuna binâen, henüz tahsîl olunmayan zehâir ve levâzım-ı sâire tertîb olunan mahallerden afv olunup berren ve bahren vürûd ile isbât-ı vücûd eden cemʿ-i maʿdûd dahi il ve vilâyetlerine rücûʿ etmek bâbında her cânibe irsâl-i berîd ve her tarafa ısdâr-ı emr-i şedîd kılınarak şehriyâr-ı bâhirü't-teyîd mazhar-ı duʿâ-yi karîb ve baʿîd oldular.