Efrenc tâifesinin Cidde benderine tevârüdleri mahdûd ve bahr-i Süveyş'in âhar mahallerine iyâb ü zihâbları memnûʿ ve merdûd iken ümerâ-i Mısriyye'den olup mukaddemâ refʿ-i livâ-i bağy ü şekā eden Ali Bey'in eyyâm-ı tuğyânında İngilizlü'nün bir kıtʿa sefînesi Süveyş iskelesine gelüp er-reşâ reşeu'l-hâce fehvâsiyle sefîne reisi olan kebr-i le'îm mîr-i mezbûra mikdâr rüşvet ve bertîl takdîm ve birkaç gün sefîne-i mezkûrenin mersâ-yi Süveyş'te rabt olunmak esbâbını tahkîm etmişidi. Giderek bu keyfiyet izn-i âme haml olunarak sevâhilde alâkası olan sâir Efrenc tâifesi dahi âmed-şüd ve bir mahall-i mahsûs binâsını tenzîl-i menzile-i mâlâ-budd edüp bir hân-ı vasîʿü'l-etrâf binâ ve âtiyede muhakkakü'l-vukūʿ olan mazarratı zuʿm-ı bâtıllarına göre güyâ setr ve ihfâ etmişler idi. Mâdde-i mezkûrede olan mahâzîr-i âkıbet-endîşân-ı umûr taraflarından ve bâ-husûs şerîf-i Mekke cânibinden ihbâr ve tahrîr ve bu semm-i muvakkatin tedbîr-i dil-pezîr ile indifâʿı matlûb-ı şehr-yâr-ı kişver-gîr olduğuna binâen İngiliz elçisine reîsülküttâb efendi beyân-ı keyfiyet ve ol dahi taleb-i mühlet ile irâde-i devleti kralına îmâ ve işâret eyledikte hânın hedm ü tahrîbi fî-mâ-baʿd o makūle sefâin (96b) mersâ-yi Süveyş'e tevârüd eylediği hâlde lüsûs-ı bahriye ve korsan sefâini iʿtibâriyle tard u tebʿîd ve mülzem olmadıkları hâlde top ve sâir âlât-ı harbiye ile eczâ-yi sefîneleri tebdîd olunmak husûsâtı, kralı tarafından tahrîr olunduğunu memhûr takrîriyle resmen ifade ve filhâl Kapucubaşı Mustafa Ağa Mısır'a firistâde olunup hân-ı mezkûru hedm ve vîrân ve karâr-gîr olan nizâmı ümerâ-yi Mısriye'ye beyân eyledi.