İşbu Saferülhayr'ın yirmisekizinci Çarşenbih günü maşrık-ı saltanattan bir âftâb-ı âlem-tâb eşiʿa-rîz-i sâha-ı vücûd yaʿnî sulb-i pâk-i şehen-şâhîden bir şehzâde-i hümâyûn baht-ı gehvâre-zîb-i taʿayyün ve şühûd olup Sultan Süleyman ismiyle nâm-dâr ve bu haber-i meserret-âsâr Dârüssaʿâde ağası vesâtatiyle (96a) sadr-ı âlî-mikdâra ihbâr olunup, tehniyet-i vilâdet-i hümâyûna müsâraʿat ve donanmadan kâffe-i nâsa sirâyet eden garâmetten vikāyet zımnında fakat tebşîr ile iktifâ ve bu zemînde memâlik-i mahrûseye neşr-i evâmir-i meserret fehvâ kılındı. Seyyid Kemal Gaznî'nin altı vechile istihrâc olunan târihidir: حلت بميلاد سلطان بشائره بالعز والنصر نبشا عادل الدهر