Hemşîre-i muhtereme-i hazret-i cihândârî bir müddetten berü illet-i istiskā ile ser-nihâde-i bâlîn-i bîmârı olup giderek illeti mütezâyid ve efzûn ve tebdîl-i hevâya tâlib olduğu dâhil-i semʿ-i hümâyûn olup, civâr-ı Hazret-i Hâlid'de vâkiʿ sâhilhânesine azîmet içün mezûn olmuşidi. Hareket-i gerdûneden müte'ezzî (93a) olduğuna binâen taht-ı revân ile yalısına vâsıl ve birkaç günden sonra dâr-ı ukbâya müntakil oldu. Bu haber-i bârid taraf-ı hümâyûndan sadrıazama vârid olup müşârünileyh ve tevkīʿî paşa ve ocağlar ağaları ve sâir huzûrları kānûn olan zevât Hazret-i Hâlid'de ictimâʿ ve şeyhülislâm efendi münharifü'l-mizâc olmak takrîbi ile adem-i huzûru bâbında istişfâʿ edüp Anadolu kādıaskeri bulunan imâm-ı evvel-i sultânîye iktidâ ve salâtı edâ olunup civâr-ı türbe-i mezkûrede o sultân-ı mağfiret-nişân vedîʿa-i hazret-i sübhân kılındı.