Ağa-yı mûmâileyh an-asl dâ'ire-i hümâyûna müntesib ve ba'de'l-cülûs (92a) sunûf-ı inâyeti müktesib olduğundan başka birâderi el-yevm silâhdâr-ı hazret-i şehriyârî ve cihet-i takarrüb ile kabz u bast-ı umûr-ı devletin medârı olmak hasebiyle birâderi mûmâileyhin tevakkud-ı necm-i rifʿatı hülâsa-ı merâm ve buğyeti olup hakkında takdîm-ı mukaddemât-ı merâm ve vezâret ve Rakka Eyâleti'yle bekâm ettikten sonra hüdâvendigâr-ı sâbık cennet-mekân Sultân Mustafa Hân merhûmun benât-ı kirâm-ı iffet-simâtlarından Şâh Sultân Hazretleri'nin dahi vakt-i izdivâcı idrâk etmiş bulunmağla devlet-i sıhriyete dahi şâyân görülüp münhal olan kapucular kethüdâlığını Selîm Ağa istihsâl ve uhdesinde bulunan matbah emâneti ile Kirli İbrâhîm Efendi tathîr-ı dâmân-ı âmâl eyledi.