Azl ü nasb-ı sadâret vukūʿunda hidemât ve menâsıb-ı devletin baʿzen inhilâli âdete karîb bir maʿnâ olduğuna binâen kethüdâ-yi sadr-ı âlî olan Süleyman Feyzi Efendi dahi azl olunup serdârlar kâtibi iken dâhil-i dâire-i ricâl-i devlet ve el-yevm tersâne-i âmire emâneti ile dil-sîr-i niʿmet-i rağbet olan Mustafa Efendi'nin kethüdâlığı cinsiyet hasebiyle tabʿ-ı sadâret-penâhîye muvâfık olup şehr-i mezkûrun ondördüncü Pazar günü kethüdâlık câh-ı refîʿiyle kesb-i mübâhât ve selefi tersâne emâneti ile tahsîl-i azmâyiş-i menâsıb ü derecât eyledi.