Bir zaman ata-bey-i devlet ve rey-i rezîn-i isâbet-karîni ile müşkilât-ı mesâlih-i (90b) devleti ber-vefk-i dil-hâh rüyete berzede-dâmân-ı ikdâm ve gayret olan reisülküttâb-ı sâbık İsmail Bey-Efendi, Derviş Paşa gadriyle Kıbrıs'a iclâ ve hakkında ağrâz u nefsâniyet icrâ olunmuşidi. Sevâbık-ı hidmeti taraf-ı hümâyûna tezkâr ve Kıbrıs'tan Sakız cezîresine ityân ile mirât-ı hâtırından izâle-i gubâr-ı vahşet ve nifâr kılınup zımnen Âsitâne'den tebʿîd ve zâhiren ünvân-ı ikbâlini tecdîd zemîni ile vezârete istihkākı sevk u tergîb ve Mısır Eyâleti Bâ-rütbe-i vezâret tarafına tevcîh ile iltizâm-ı semt-i tatyîb olunup iktizâ eden hilʿati müderrisîn-i kirâmdan mahdûm-ı necâbet-lüzûmu olan İsmet İbrâhim Bey-Efendi'ye vekâleten teşrîfâtî efendiye iksâ ve tevcîh ve me'mûriyet emri mahdûm-ı mûmâileyh tarafından savb-ı müşârünileyhe baʿs u isrâ olundu.