Kapucubaşılıktan defʿa-i kethüdâ-yı sadâret-penâhî ve çok geçmeden vekâlet-i mutlaka ile nâ'il-i avârif-i nâ-mütenâhî olan Dârendeli Mehmed Paşa müsinn ü ihtiyâr ve rişte-i hevâ vü hevesi münkatiʿ bir pîr-i kâr-güzâr olmak ihtimâliyle makām-ı ulyâ-yı sadârete sezâ-vâr görülmüşidi. Birkaç mâh kadar batâne-i ahvâli mestûr ve kendüden devlete nâfiʿ umûr-ı azîme zuhûru muntazır-ı erbâb-ı akl u şuʿûr iken yirmibir mâhdan ibâret olan eyyâm-ı sadâretinde cüz'î ve küllî bir hidmet-i müfîdeye muvaffak olmayup sû-i kurenâ mülâbesesiyle rü'yet ettiği umûr muʿallelün-bi'l-garaz ve görmediği mesâlih-i hâlin ani'l-ivâz olduğundan fazla ibtidâ-yı sadâretinde (91a) "ne alur ne veririm" daʿvâsın edüp ahad-i ahdeynin şuhh u imsâk tarafın iltizâm ve diğerine dayanamayup etrâftan hayli şey iğtinâm eyleyüp bâ-husûs azlinden çend-rûz mukaddem fevt olan hazînedârı bir merd-i kem-hired ve mezbûb ve vekāhet ve sefâhet ile maʿyûb iken merkūma her hâlde mağlûb olup sevk ettiği mekkâre umûru tesviyeye mecbûr ve yüzünden vâfir kimseler mağdûr olup bundan böyle sadrında temkîn olunsa devlete bir fâ'ide ve halka bir menfaʿat-i zâ'ide terettüb etmeyeceği maʿlûm-ı hümâyûn olduğuna binâen azli izmâr ve Şâban-ı şerîfin sekizinci günü yed-i râşedârından mühr-i hümâyûn nezʿ olunup Bozcaada'ya tesyâr olundu. Yeniçeri ağası olan Mehmed Ağa'nın mirât-ı kalbi gayyâr-ı gıll ü gışdan pâk ve me'mûr olduğu hutûbun hall ü akdinde sâhib-i hûş ü idrâk olup yeniçeri ağalığının iki defʿasında dahi memdûh ve nâm-ver ve bu esbâb ile her tavrı muvâfık-tabʿ-ı pâdişâh-ı bahr ü berr olduğuna binâen yevm-i mezkûrda dest-i ihlâs-peyvestine mühr-i hümâyûn teslîm ve selefinin illet-i azli vicâhen ifâde ve tefhîm olunup, serhadler ahvâline takayyüd ve ihtimâm ve alelhusûs der-dest-i nizâm olan Kırım keyfiyetine nazar ile defʿ-i şikāk u hısâm etmek tenbîhâtı zîb-i sâmiʿa-i şuʿûru ve akdem-i şevârid-i umûru kılındı. Bu takrîb yeniçeri ağalığı münhal olup kul kethüdâsı olan İbrâhim Ağa Yeniçeri ağası nasb ve ocağ ricâli bu silsileden istîfâ-yi hazz ile sunûf-ı meserret celb eylediler.