Şehriyâr-ı sütûde-âsâr hayrât ve müberrâta meyl ile tahsîl-i rızâ-yi perverd-gâr fikrinde olduklarına binâen mukaddemâ bir imâret ve vâlâ-tâk inşâsiyle sît-i medîhasın îsâl-i küngüre-i âfâk buyurmuşlar idi. Beylerbeyi nâm mahalde dahi vâlide-i müşfikaları merhûme Râbia Sultan içün bir câmi binâsı irâde ve doksanbir senesi Saferülhayr'ında esbâb ve levâzımı âmâde olunup ağa babası Mustafa Ağa emîn-i binâ nasb u ta'yîn ve birkaç gün sonra Darbhâne Emîni Hafız Mustafa Efendi merhûma câ-nişîn olup hâtır-hâh-ı pâdişâhî üzere emr-i binâya dâmen-çîn ve bu hilâlde hayyiz-i hitâma karîn olduğu arz-ı südde-i şehriyâr-ı bâhirü't-temkîn kılınmış idi. İşbu şehr-i Recebülferd'in yirmibirinci Cuma günü şehinşâh-ı âlî-himmet câmiʿ-i mezkûrda edâ-yi salâta mübâderet ve binâ emîni ve dâmâdı İsmet İsmail Efendi'yi semmur kürkler ilbâsiyle mültefit buyurup câmi'-i mezkûr müşârünileyhe nisbet ve hâsıl olan sevâb rûh-ı latîflerine hibe olunmak emr-i hümâyûnu işâ'at olundu. Bu sebeble câmiʿ-i mezkûr etrafı buyût ve sâhilhâneler ile maʿmûr ve âbâd ve hamâm ve dekâkîn ve tâhûne ve besâtîn ile nümûne-nümâ-yi İrem-i zâtü'l-imâd olup lâzım gelen evkāfı bâligān-mâ-belag tesviye ve tanzîm ve mâh be-mâh erbâb-ı vezâife tevzîʿ ve taksîm olunarak katı çok kimseye bâ'is-i nefʿ-i azîm oldu.