Bir zaman arpa emâneti ile iştigâl ve "mîrîde küllî matlûbum vardır" deyü her bâr bast-ı makāl eden Ali Ağa'ya hakkü's-sükût olarak cebecibaşılık tevcîh olunup ber-vech-i tedrîc matlûbunu istîfâ eyleyeceği vaʿdiyle (88a) tenşît ve tefrîh olunmuşidi. Dehân-ı pür-hezeyânına darb-ı hakeme-i sükût edemediğinden fazla, eyyâm-ı vebâiye takrîbi ile ocağların cümlesi hallerine göre mahlûl takdîm ve ocağında vâkiʿ olan mahlûlâtın baʿzısını mûmâileyh nefsine istihlâs ve bâʿzısını beyʿ ve bir mikdârını havâss-ı etbâʿına taksîm edüp bu keyfiyet münhiyân ihbâr ile gûş-güzâr-ı sadr-ı âlî-mikdâr olduğuna binâen filhâl azl ile te'dîb ve dergâh-ı âlî kapucu başılarından Süleyman Ağa mansıb-ı mezkûr ile tatrîb olundu. Mûmâileyhin azliyle iktifâ, sâiri semt-i hıyânete iğrâ kabilinden olup binâen-alâ-zâlik birkaç günden sonra İsmâîl ordusuna me'mûr ve mahall-i mezkûrda devlet-i hayattan mehcûr olup endâhte-i ceyb-i kitmânî olan bin akçe mahlûl mûcib-i hayret-i erbâb-ı ukûl oldu. Merkūmun siʿa-i hâli maʿlûm ve erbâb-ı cihâda mahsûs olan rivâyete adem-i ihtiyâcı meczûm iken ahz ü sarfı suht-ı sırf makūlesinden olan beytü'l-mâle bî-vech ve sebeb itâle-i dest taleb-i dünyâ ve ukbâda mûcib-i gazab-ı Rabb olacağı bî-reybdir.