Meşgale-i fetvâdan reh-yâb-ı ezâ ve maraz-ı mühlikine çâre-cû-yi şifâ olan Mehmed (87a) Esad Efendi [Mısra]: Vedâʿü'l-mevti leyse lehû devâʿun Câmından cürʿa-nûş-i memât ve işbu Recebülferd'in üçüncü günü âzim-i semt-i arasât oldu. Tercüme: Müşârünileyh bin yüz ondokuz senesinde şeyhülislâm-ı benâm ve ilm ü kemâl ile meşhûr-ı enâm olan Vassâf Abdullah Efendi'nin sulb-i pâkize-siriştinden ser-nümâ-yi vücûd ve gehvâre-zîb-i şühûd olup, istîfâ-yi akl-ı heyûlânî ve istihsâl-i mukaddemât-ı cüvânî akabinde peder-i ma'ârif-güsterlerinden iktibâs-ı envâr-ı kemâlât ve bi-hasebi'l-istiʿdâd mir'ât-ı tabʿ-nâkı kābil-i suver-i maʿkūlât olmuşidi. Lisân-ı hâli "Ülâ'ike âbâ'î fe-ci'nî bi-mislihim" terâneleriyle dem-sâz ve Mirzazâde Mehmed Efendi meşîhatinde hâric ruûsiyle dest-ârâ-yı iʿzâz olup, altmışdörtte tarîk-i sahîk, medâristen reste ve Galata Mevleviyeti'ne bâyeste olmuşidi. Altmışsekiz hilâlinde dest-yârî-i himmet-i peder ile Edirne ve Mekke pâyelerini ihrâz ve emsâl ve eşbâhını dâğ-dâr-ı sûz ü güdâz edüp baʿde'l-infisâl pederleri ile Bursa'ya ʿâzim ve ıtlâkına dek müşârünileyhe müsâmir ve münâdim olup Âsitâne'ye vürûdunda halef-i vâlidi Dâmâdzâde Feyzullah Efendi yedinden tenâvül-i zehr-âbe-i keder ve fart-ı tecellüd ve sebât ile iğlâk-ı dervâze ve der edüp neşîdeleriyle "Entüm ahibbâ'î ve kad feʿaltüm fiʿle'l-ʿidâ hattâ teraktüm haberî fi'l-ʿâlemîne mübtedâ" tervîc-i nefs ve onbir sene İstanbul pâyesinde tevakkuf ile imrâr-ı yevm ü ems edüp târîh-i mezkûrda ne bir kimseye ifşâ-yı râz ve ne bir kimseye menkūbiyetden halâs içün dest-niyâzı dirâz etmişidi. (87b) "Nefessenî habsen ʿani'l-cezaʿı" ibâret olan sabruhû taʿlîk ve anâtah ve iʿânet-i mâ-sivâyı kalbinden bi'l-külliye izâle ve imâte eylediği halde "Ve mâ'd-dehru fî hülli's-sükūni bi-sâkinin ve lâkinnehû müstecmiʿun li-vüsûbin" mâ-sadakınca takdîr-i Bârî tahrîk-i sâkin ve defʿ-i mebâğız ve müşâhin ederek eyyâm-ı kürbeti sabâhü'l-ʿîd sürûra münkalib ve dâmen-i ikbâl tarafına münsehib olup seksenikide Anadolu sadâretiyle harâret-i derûnu teskîn ve seksendokuzda câh-ı vâlâ-yı meşîhat ile dûş-ı iʿtibârı tezyîn ve müddet-i kalîlede katʿ-ı derece ile ferâmûş-gerde-i gam-pîşîn olmuşidi. İki sene yirmiüç gün zînet-bahş-ı câh-ı meşîhat ve baʿde'l-ʿazl ârâm-gâhı reyîne ihâle olunduğuna binâen dâhil-i silk-i mülkü olan Mîrgūnoğlu Sâhilhânesi'nde bisât-ârâ-yı ikāmet olmuşidi. Bikaç gün meşgale-i dünyâdan ifrâğ-ı dimâğ edüp fevti günü salât-ı subhu kā'imen edâ ve visâdesine ittikâ ve ikrâr-ı vahdâniyet-i Hüdâ eyleyerek ʿâzim-ı sû-yı ukbâ oldu. Nâʿşı civâr-ı Hazret-i Hâlid'de vâkiʿ Siyavuş Paşa Türbesi etrâfında vediʿa-i hâk-i ıtr-nâk kılındı. Müşârünileyh hüner ve maʿrifetten hisse-mend ve sabr u tahammül-i nevâib-i rüzgârda şebîh-i kûh-i Elvend olup çelebi-mizâc, rûşen-minhâc, hukûk-perver bir zât-ı mürüvvet-güster idi.