İşbu Cumâdelâhire'nin beşinci Salı günü tavâif-i askerînin bir kıst mevâcibleri ihsân ve üç günden sonra Paşa Kapusu'nda devr olup teşrîfât-ı seniyye ile sadr-ı vâlâ-şân ferîh ve cezlân kılındı. Rumeli kazaskeri (85b) olan Dürrîzâde merhûmun necl-i necîbi Nurullah Efendi Cuma dîvânında mizâcı münharif ve taʿâmdan istiʿfâ ile hânesine munsarif olup vücûduna ârız olan illet hummâ-yı vebâî olduğuna nisbetle edviye-i etibbâ [Mısraʿ]: "Ez kazâ işkencebîn safrâ füzûd" maʿnâsına resâ olup Cumâdelâhire evâilinde terk-i hayât-ı müsteʿâr ve azm-i dârü'l-karâr eyledi. Mumâileyh otuzyedi târîhinde rû-nümâ ve terbiye-i dâye-i feyz-i Hudâ ile kesb-i neşv ü nemâ ettikte hâric ruʿsiyle dâhil-i dâire-i ulemâ olup yetmişbir senesinde ahad-i mevâlîden maʿdûd ve seksenbeşte Mekke-i Mükerreme pâyesiyle mahsûd olmuşidi. Seksenaltı Receb'inde Kostantiyye'ye ile müşerref ve seksenyedide Anadolu sadâretiyle gûş-ı iʿtibârı müşennef, doksanbirde Rumeli pâyesiyle mutayyeb ve doksanikide bilfiil Rumeli sadâretiyle dest-zen-i şevk u tarab olup târîh-i mezkûrda vefât ve terk-i kâr u bâr-ı kâinât eyledi. Müteveffâ-yı mûmâileyh ulûm-ı cüz'iyyede mâhir ve ibâre istihrâcına kādir kesret-i kütübe mâlik ve sâir ulûmda akrânına müşârik idi. Bu takrîb ile Rumeli sadâreti münhal ve Esad Efendizâde Şerîf Molla Efendi sâniyen sadâret-i mezkûreye şâyân ve mahall görülüp huzûr-ı sadr-ı âlîde iktisâ-yı hil'at ve neşr-i ahkâm-ı şerî'at eyledi.