Kırım tarafına (85a) me'mûr olan donanma-yi hümâyûn birkaç gün zarfında lenger alup Bahr-i siyâha feth-i şakka-i azîmet eylemek memûl-i aʿlâ ve dûn iken Keştî-i dil sâhil-i maksûda dil-teşne, velî / Lücce-i hayrette kaldım, rüzgârım yok gibi. Mefhûmunca tehâlüf-i hevâ süfün-i mezkûreyi kırk gün kadar mahbûs-ı deryâ edüp baʿzı ehl-i ven rûhânî esbâba meyl ü rükûn maʿnâlarını işâret ve Kelâm-ı Kadîm'den sonra asahh-ı kütüb olan Buhârî-i Şerîf tilâvetinde husûl-ı matlab-ı mücerreb olduğunu delâlet etmişidi. Medîne-i Münevvere sükkânından Hâfız-ı Buhârî-i Şerîf olan Ebu't-tayyib o esnâda Âsitâne-i saʿâdet'e gelmiş bulunmağla haklarında hüsn-i zann olunur yedi kimse maʿiyetine terfîk ve Enderûn-ı hümâyûnda kırâat-i Buhârî'ye bed' ile eser-i şerîfi tahkīk olunup, şöyle ki nısfına varmadan o derârî-i asdâf-ı nübüvvetin envâr-ı âsârı işrâk ve hübûb-ı bâd-i muvâfık ile mecrâ-yı deryâ indifâk edüp Karadeniz Boğazı'ndan sefâin-i donanma hurûc ile savb-ı matlûba cereyân ve bu keyfiyet cümleye ifâza-i sürûr-ı bî-pâyân eyledi. "Matlab hâsıl oldu" deyü nısf-ı âhirin tilâveti terk olunmayup birkaç gün zarfında tetmîm ve kırâate nâmzed olanlar hakkında atâyâ-yı şâhâne taʿmîm olundu.