Kayseriye Mutasarrıfı Çatalcalı Vezîr Ali Paşa'nın dâiresinde izdihâm ve belde-i mezkûre halkı bu sebeble âvâre rû-yı râhat (86a) ve ârâm olup Rahmân li'l-fukarâ Kayseriye'den azl ve Eğriboz mansıbına isrâ ve Kandiye, Hanya Muhâfızı Vezîr Silâhdâr Emin Paşa'ya ve Hanya, Yazıcızâde Vezîr Mustafa Paşa'ya ve Resmo Sancağı, Yenişehirli Vezîr İsmâîl Paşa'ya tevcîh olunup iktizâ eden evâmir ısdâr ve taraflarına tisyâr olundu. İsmâîl ordusunda ağa olan bilfiil Kul Kethüdâsı Hasan Ağa İsmâîl'e varmazdan mukaddem sevk-i askere me'mûr ve hidmet-i pâdişâhîden rû-gerdân olanlar kuvve-i batş ü celâdetiyle müdemmer ve makhûr olup Zağra-ı atîk kasabasından dahi birkaç şahs-ı muhâlifi i'dâm ve ibret-i enâm etmişidi. İsmâîl ordusunda tahaşşüd eden yeniçerilerin ba'zısı firâr edüp verâlarından âdem ta'yîni ile tuttuğunu mahbese vaz' edüp giderek mahbûslar mütekessir ve mukaddemâ ağa-yı mûmâileyh savletinden müteessir olanlar "mahbûslar katl olunacaklar imiş" şâyi'asıyla cem'iyyet ve sell-i şemşîr-i gadr ü ihânet ile ağa-yı mûmâileyhi katle cesâret eylediler.