Kul kethüdâlığından maʿzûl iken rütbe-i vezâretle Diyarbekir Eyâleti tevcîh olunan Elhac Halil Paşa ecel-i müsemmâsiyle azm-i dâr-ı ukbâ edüp, münhal olan mansıbı Kudüs Sancağı'na mutasarrıf olan Vezîr Gazi Ahmed Paşa'ya tevcîh olunup, Bender muhâfazasında olan Vezîr Mehmed Paşa'ya Haleb Eyâleti ve selefi Vezîr İbrâhim Paşa'ya Kilis ve Aʿzaz sancağları ve Yergöğü muhâfazasında olan (84b) Vezîr Seyyid Hasan Paşa'ya Bender Kalesi'ni bi'n-nefs muhâfaza etmek şartıyla Aydın Sancağı ihsân ve bu zeminde cümlesine ısdâr-ı fermân-ı âlî-şân kılındı. Müteveffâ-yi müşârünileyh Bağdad'a yeniçeri kitâbeti ile gelüp tavr u reftârı Süleyman Paşa merhûmun tabʿına muvâfık geldiğinden Bağdad ağalığın istihsân ile hakkında ârife-i vezîrânesin ikmâl etmişidi. Ağalığı eyyâmı âsûde hâle tesâdüf edüp vakti dahi mümtedd olduğundan vâfir mâl iddihâr ve ırz u vekārıyla azl olunup kıbletü'l-âmâl olan Âsitâne-i saʿâdet'e ilkā-yi raht-kâr u bâr etmişidi. Ocak tarafından baʿzı muğlak umûra taʿyîn ve her maddeyi dest-yârî-i akl u tedbîriyle teshîl ve tehvîn eylediğinden dâhil-i katâr ve giderek kul kethüdâlığı derecesini kesb ile sâhib-i iştihâr olup taʿayyün-i zâtîsi yeniçeri ağası bulunan Kuyucu Süleyman Paşa'ya bâʿis-i hadşe-i derûn olup ednâ bir sebeb isnâdıyla makāmından ibʿâd ve kayd-ı gurbetle endûh ve ekdârını müzdâd etmişidi. Pâk-tıynet gûşe-i gurbette hâr olsun mu hiç / Cevher âgûş-i sadeften dûr olur kıymetlenür. Fehvâsı üzere çok geçmeden hâdise-i Bağdad zuhûriyle kevkeb-i ikbâli fürûzân ve o havâli umûruna vukūfu nümâyân olduğundan rütbe-i vezârete şâyân görülüp minvâl-ı muharrer üzere vefât ve vedîʿa-i rûhunu teslîm-i yed-i hâdimü'l-lezzât eyledi. Müşârünileyh cesâret-i müfrita ile meşhûr ve tehdîdini îkāʿa kādir bir düstûr u vakūr idi.