Kırım seraskeri olan Vezîr Ali Paşa on bin kadar tâmmü's-silâh ve melûf reviş-i ceng ü kifâh asker-i güzîde intihâb ettiyse dahi, asker-i mezkûru iʿmâl ve idâreye kādir ve nüfûz-ı kelime ile kadr ü iʿtibârı zâhir bir şahs-ı mütemeyyizin başbuğ olmasını mûcibât-ı vakt-i hâl iktizâ ettiğini îmâ ve eyâlet-i Sivas inzimâmiyle ekber evlâdı olan Mikdâd Ahmed Bey'e rütbe-i vâlâ-yı vezâret ihsân olunduğu takdîrde Soğucak Kalesi'ne varup Rusyalu'nun kavlen ve fiʿlen cezb ve imâlelerine takayyüd ve ihtimâm eyledikleri kabâili tedbîrât-ı akliye ile Rusyalu'dan tebrîd ve an-asl Devlet-i aliyye'ye merbût olan hablü'l-metîn itāʿatlerin teşyîd etmek ve imkân müsâʿid olduğu takdîrde Taman ve sâir kılâʿı âverde-i dest-i zabt edüp menşûr-ı inkıyâdların tecdîd eylemek maʿnâlarını berâhîn-i müselleme ile teyîd edüp, zikr olunan tedbîr-i muvâfık rey-i müşîr ü müsteşîr olduğuna binâen şehr-i Rebîülâhir'in onbeşinci günü mîr-i mûmâileyhe Sivas eyâletiyle câh-ı vâlâ-yi vezâret i'tâ ve Erzurum Eyâleti dahi pederi müşârünileyhe teksîr-i sevâd-ı asker mülâhazasiyle tevcîh buyrulup selefi Seyyid İbrâhim Paşa (84a) Kars muhâfazasına bi'l-iktizâ baʿs u isrâ olundu.