Ahâli-i Kırım ve kabâil-i Tatar'a imdâd zımnında berren ve bahren tertîb-i ecnâd mukaddemâ tasmîm-gerde-i devlet-i gazâ-yi iʿtiyâd olduğuna binâen mersâ-yi tersâne-i âmirede mevcûd olan merâkib-i bahriyenin fî-esraʿi'l-eyyâm levâzımı itmâm olunduğu kapudan paşa tarafından arz ve ifhâm olunmuşidi. Rûz-ı Hızır takarrüb eylediğine binâen müşârünileyhin alay gösterüp Bahr-i siyâh tarafına şakka-güşâ-yi azîmet olduğu haberi Kırım seraskeri Vezîr Ali Paşa'nın resîde-i sâmiʿa-i ittikānı oldukta memûr olduğu askerin verâsını alup ihzâr ettiği askeri sefâine teşhîn ve imlâ ve ale't-te'âkub o tarafa sevk ve izcâ eyleyeceği mütâlaʿa (83a) ve bu mülâbese ile kapudan paşanın teveccüh ve azîmetinde izhâr-ı sûret müsâraʿa olunmağla işbu şehr-i Rebîülâhir'in onuncu ve Rûz-ı Hızır'ın dördüncü günü kapudan paşa alay gösterüp huzûr-ı hümâyûnda iktisâ-yi hilʿat ile âric-i meʿâric-i mefharet ve bilâ-tevakkuf Bahr-i siyâh boğazından hurûc ve memûr olduğu mahalle bâd-bân-güşâ-yi azîmet olmasını şehriyâr-ı mekârim-âde şifâhen tarafına ifâde ve Beşiktaş pîşgâhında bâd-i muvâfık hübûbuna dîde-i intizârı güşâde eyledi. Müşârünileyhin donanma-yi hümâyûn ile azîmeti serasker-i müşârünileyhe ihbâr ve bir an akdem icrâ-yı memûriyete kendü dahi berzede-dâmân-ı ihtimâm olması bâbında hükm-i cihân-mutâʿ ısdâr olundu. Kapudan paşanın donanma-yı hümâyûn ile Karadeniz'e memûriyeti hasebiyle Akdeniz'in hulüvvi zâhir ve gayr-i mübhem ve lüsûs-ı bahriyeden muhâfazası emr-i ehemm görüldüğünden müşârünileyhin kethüdâsı kifâyet mikdârı sefâin ile Akdeniz'e taʿyîn ve irsâl ve emr-i muhâfazada nakdine nesâr-ı gayret olmak tenbîhâtı zarf-ı gûş-ı huşûna idhâl olundu. Rusyalu maslahat-ı serbestiyeti tanzîm ve ahâlî-i Kırım ve kabâil-i Tatar'ı ilzâm sûretinde Kırım'a dâhil olup şurût-ı müsâlahayı vikāyede ihtimâm üzere olduklarını Devlet-i aliyye sefâininin Olta limanına geldikleri hîn-i münâfî resm-i dostî taraflarından bir vazʿ-ı yed zuhûr etmediğini sened ittihâz eyledikleri her ne kadar hiyel-i âlem-i firîblerinden maʿdûd ise dahi zâhir-i hâlde vikāye-i şart iddiʿâsında oldukları hasebiyle o tarafa memûr olanlar maslahata nazar ile (83b) Kırım'dan Rusyalu'nun hurûcu esbâbını tahsîl ve iktizâ eyledikte mükâleme ile bu hatb-i ehemmi teshîl etmek sûreti nezd-i erkân-ı saltanatta fiʿl-i cemîl add olunup müşârünileyhimâya iki kıtʿa Ruhsatnâme tahrîr ve tesyîr ve mutabassırâne hareket ile şân-ı devleti her hâlde vikāye eylemeleri tenbîh ve tezkîr olundu.