Şehr-i Rebîülevvel'in beşinci günü Fethiye Câmiʿi kurbinde vâkiʿ Kiremit Mahallesi'nde bir bakkal dükkânından zuhûr-ı âteş o tarafta bulunanların ahvâlini müşevveş edüp, beş altı saat kadar mümted ve memûrlara bâʿis-i taʿab u kedd olduğundan herkes yed-i tazarruʿu dergâh-ı ulûhiyete medd edüp nâ-gâh avn-i sübhânî bedîdâr ve itfâ-yı nâr ile umûm-ı vâreste-i gumûm u ekdâr oldu. Şehr-i mezkûrun onikinci günü deb-i dîrîn-i devlet-i ebed-karîn üzere Sultan Ahmed Câmiʿ-i şerîfinde nazm-ı güzîn-i Mevlid-i hayrü'l-mürselîn kırâati ile huzzâr-ı meclis feyz ve rûhâniyete hem-dem ve mûnis oldular. Sâbıka sadr-ı Rum olan Mehmed Murad Efendi bundan akdem Gelibolu'ya nefy ü tebʿîd olunup intizâr-ı ferah ferec ile dîde-be-râh-ı ümîd iken hakkında olan siʿâyet gün be-gün mütezâʿif ve bu sebeble aksâm-ı gazab hakkında müterâdif olup mahzâ Âsitâne-i devletten dûr ve melûf olduğu râhat ve âsâyişten mehcûr olmak kasdiyle tarafına Medîne-i Münevvere kazâsı tevcîh olunup ol bâbda ısdâr-ı menşûr kılındı. Garîbe: Medîne-i Münevvere kazâsı bi-hasebü'n-nevbe Otlukçuzâde'ye tevcîh olunmak tasmîm ve bu keyfiyet mûmâileyhe tefhîm olundukta kuvvet-i bedeniye şurût-ı hacdan olduğunu îrâd ve pîrliğini illet eyleyerek afvını niyâz ve irtiyâd eylediğini Murad Efendi'nin bed-hâhlarına mecâl-i kelâm olup (82a) kuvvet-i mâliye ve bedeniyesi her taraftan zikr ü beyân ve bi-hasebi'l-beşeriyye kendüsünden sudûr eden uyûb-i zünûbi o bukʿa-i mübarekede bi'l-istiğfâr izâle eder maʿnâlarıyla Medîne-i Münevvere tevcîhini istihsân eyledikleri baʿzı mevsûkü'l-kelim kimselerin ihbâriyle sâmiʿa-res-i erbâb-ı ittifâk olup Otlukçuzâde'nin dahi Medîne-i Münevvere kazâsının kabûlünde îrâd ettiği özr-i müvecceh makbûl olmayup, hilâf-ı âde rütbesi bilâd-ı erbaʿaya tenzîl ve mâdûnî olanları üzerine takdîm ile tahcîl ve tezlîl olundu. Murad Efendi hakkında tertîb olunan isâet-i aʿvân ve ensârına sirâyet edüp Beytülmâl kâtibi ettiği Şemʿdânîzâde ve Ağa Kapusu kassâmı ettiği eniştesi Müderris İzzet Efendi mülâbese-i ittisâl ile birer mahalle tağrîb ve irsâl ve ekâbir-i kudâttan Çeşmîzâde dahi isâbet-i ayn-ı aʿdâ ile nazar-ı iʿtibârdan sâkıt ve o dahi hibâle-i teng-i bend-i gurbete murtabit oldu. İstanbul'dan mağzûl ve Anadolu sadâretine nigeh-endâz-ı memûl olan Hayâtîzâde Mehmed Said Efendi hulf-i matlabdan tersân ve buna dâir baʿzı havâdis istimâʿ ettiğini huzûr-ı fetvâ-penâhîde zebân-güzâr-ı beyân olup, umûr-ı tevcîhât meşiyyet-i Hakka makrûn olduğunu müşârünileyh îmâ ve irâdesini ihfâ eylediği Hayâtîzâde Efendi'ye îrâs-ı şübhe ve gümân ve filhâl bu mazmûnda bir arz-ı hâl yazup Cuma günü Ayasofya'da arz-ı pîş-gâh-ı hidîv-i zamân edüp bu vazʿ-ı nâdir şeyhülislâm efendiye sebeb-i şiken-i hâtır olup, sâhilhânesinde meks ü ikāmeti takrîr ile cihet-i tedîbini (82b) teshîl ve mûmâileyh belâ-yi hırs ile yalıda mahbûs olmak beliyyesini hod be-hod tahsîl eyledi. Mora cezîresi istilâ-yi kefereden vâreste oldise dahi eyâdî-i eşkıyâ-yi Arnabud'a giriftâr ve muhassılı olan Vezîr Morevî Ahmed Paşa gürûh-ı mezbûru ihrâca muktedir olmadığından reʿâyâ pâ-zede-i mazarr ve memleket târ-mâr olduğundan nazar-ı katʿ ile kendüsü dahi bir taraftan tecrîm-i reʿâyâ ve celb-i emvâl-i fukarâ eylediği südde-i seniyye-i cihândârîye inhâ olunup mâh-ı mezbûrun yirmibeşinci günü mansıbı Eğriboz muhâfızı olan Vezîr Mehmed Paşa ile mübâdele ve eyâlet-i Şam, urbân ile hüsn-i sülûku şuyûʿuna binâen Azmzâde Vezîr Mehmed Paşa'ya ve eyâlet-i Trablus mîrimîrândan müşârünileyhin mahdûmu Yusuf Paşa'ya ihâle olundu.