Bağdâd vâlisi olan Vezîr Abdullah Paşa ilel ü emrâz-ı gûnâ-gûn ile nâlân ve zebûn olduğu o tarafa me'mûr Sırrı Selîm Efendi tarafından resîde-i sâmiʿa-i hümâyûn olmuşidi. Ahvâl-i Irak'a vukūf ve ıttılâʿı olup el-yevm Musul vâlisi bulunan Vezîr Hasan Paşa'ya nihânî kāimmakāmlık emr-i şerîfi tesyâr ve öyle bir hâlet zuhûr ettiği an Bağdad'a revân (81a) olması işʿâr olunmuşidi. Abdullah Paşa mübtelâ olduğu illetten tahlîs-i cân edemeyüp sû-yi âhirete şitâbân oldukta atbâk-ı ahâli ile Hasan Paşa'ya irsâl-i berîd ve vâkiʿ olan keyfiyet ehl-i memleket tarafından arz-ı südde-i şehriyâr-ı bâhirü't-teyîd kılınup, ahâlinin Hasan Paşa tarafına derkâr olan meyl ü incizâbı ve müşârünileyhin dahi ahvâl-i Irak'a usûrundan başka Bağdad'a takarrübü incâh-ı matlabına vesîle olup şehr-i Rebîülevvel'in beşinci günü eyâlet-i mezbûre müşârünileyhe tevcîh ve ısdâr-ı kabâle ve istihlâs-ı Basra ve tathîr-i hudûd umûru uhdesine tefvîz ve ihâle kılındı. Tercüme: Müteveffâ-yi müşârünileyh, Süleyman Paşa memâlîkinden olup tedrîc ile kethüdâlık mansıbına ihrâz ve tekerrür ile akrânı beyninde kesb-i imtiyâz etmişidi. Mukaddemâ beyân olunduğu vech üzere Bağdad'a vâli ve Hâlid Paşa gāilesini ber-taraf ettikten sonra sît-i şöhreti o havâlide bâʿis-i tamânînet-i ahâli olup târih-i mezkûrda illet-i pîrî ilel hâdisesine munzam ve hulûl-i ecel-i mevʿûdiyle mücânisi olan türâbe müdgam oldu. Müşârünileyh ednâ bir maddeyi hod be-hod tanzîmden âciz ve hasr u gabâveti zâhir ve bâriz iken kethüdâlığı ve vezâreti hâlinde vâkiʿ olan umûr-ı Bağdad'ı fevka'l-memûl tesviye ve rüyet bahtında olan saʿâdet ve tâliʿinde olan kuvvetten neşet eylediğinden gayri fî-hadd-i zâta mütevekkil ve cehline muʿterif ve sâde-dil bir zât olduğundan cenâb-ı Hak umûrunu teshîl ve istiʿdâd ve kemâl müstelzim-i merâtibdir, iʿtikādında olup ahkâm-ı takdîr ve meşiyyeti hâtırdan ihrâc (81b) edenlere min-kıbeli'r-rahmân bir nevʿ-i tezlîl olduğu vâreste-i kāl ü kīldır.