Kırım halkının istigāseleri hasebiyle bundan akdem asâkir ile meşhûn (77b) yedi kıtʿa kalyon hıtta-i Kırım'a irsâl ve esbâb-ı imdâd ve iʿâne istihsâl olunmuşidi. Sefâin-i mezkûrenin hübûb-ı bâd-i muhâlif ile o taraflara vusûlleri müyesser olmadığından berü yakaya ʿavd ü insırâfları mesmûʿ oldiyse dahi el-yevm ne mahalde oldukları mechûl ve kapudan paşa tarafından tefahhus olunarak istikşâf-ı hâl emr-i maʿkūl görülüp, müşârünileyh dahi mahsûs menzil kayığı taʿyîn ve vürûd-ı ahbâra havâle-i semʿ-i yakīn etmişidi. Mürseli olan şahıs vârid olup sefâin-i mezkûre imdâd-ı mürsilü'r-riyâh ile sevâhil-i Kırım'dan Olta limanına lenger-endâz ve Rusyalu tarafından sefînelere taʿarruz olunmayup, hanlık maddesi sûret-yâb oluncaya dek bir sefîne ile kapudanı kalup sâiri ʿavdet etmek bâbında dest-bâz-ı niyâz olduklarını ve Olta limanı iki yüz pâre sefâini ihâtaya vâfî metin ve müstahkem bir liman olup on bin asker ile hıfz u vikāyesi mümkün olduğunu beyân ve gemiler ʿavdet etmek lâzım olursa Moskovlu tarafından filhâl tabye ve toplar ile istihkâm verilüp vâfir donanma ve kırk bin kadar asker ile teshîri kābil olmayacağını takrîr eyledi. Rusyalu'nun tanzîm-i umûr-ı serbestiyet, daʿvâ-yı muʿalleli ile Kırım'a duhûlü bir kâr-ı düşvâr ve taraflarından Şahin Giray'ı cebren han nasb etmek mûcib-i muhâzir ve ihtâr olup liman-ı mezkûrun hıfzı ve Kırım'a iʿânetin esbâbı şimdiden ihzâr olunmak vâcibât-ı umûrdan add olunup bu keyfiyet Kırım seraskeri Vezîr Ali Paşa'ya ber-vech-i tafsîl tahrîr ve maʿiyetinde olan askerden sekiz bin nefer ifrâz ve limanın (78a) vikāyesi bâbında tesyîr veyâhud bi'n-nefs kendüsü varup bu emr-i hatîri temşiyet-pezîr eylemesi tezkîr ve tahyîr olunmuşidi. İrâde-i devlet müşârünileyhe ayân oldukta a'dânın sefâin-i devlete adem-i müdâhalesi kemâl-i hadiʿa ve mekrinden neşet ettiği zâhir ve Şâhin Giray gāilesini ber-taraf ettikten sonra Olta limanını zabt içün mecmûʿ-ı kuvvetini sarf ile sefînelere îrâs-ı hatar eyleyeceği vârid-i hâtır olup Tatar'ın def-ı ıztırâbı cihet-ı uhrâ ile mutasavver ve sefînelere maʿâzallâh hatar tatarruk eylese âr u nakīsası devlete rücûʿ ile îrâs-ı keder eyleyeceği mukarrer olduğundan başka mahall-i mezkûr câ-yi tahassun ittihâz olunsa bile Kırım'a hücûm zımnında araba ve deve tedâriki müteʿassir ve Kırım ülkesi meftûhü'l-etrâf olup, her cânibini tahkîm Rusyalu'ya müteʿazzir olmağla yâ fazl-ı rabb-i kadîr mevsim-i sayfda her tarafına yanaşmak emr-i yesîr olduğunu ifâdeden başka Kırım adasının taraf-ı vâhidini zabt ile teshîri mümteniʿ olup tedârükât-ı kaviyye ile birkaç taraftan hücûm ve iktihâma muhtâc olduğunu tezkâr ve bu ihtimâlât merdûd-ı vâhî add olunup, herçih bâdâ-bâd sûretinde amel olunmak emr olunduğu hâlde cevâb-ı katʿiye intizârını işʿâr eyledi. Devlet-i aliyye'nin irâdesi ve müşârünileyhin ifâdesi erkân-ı saltanat ile lede'l-müzâkere muktezâ-yı hâl ne ise icrâ olunmak bâbında Bâbıâlî'de akd-ı encümen-i müşâvere olunup müşârünileyhin tafsîl ve itnâb ettiği muhâziri herkes teslîm akabinde kapudan paşa Olta'da olan sefâin kapudanları Rusyalu'ya muhârebe içün gelmeyüp Tatar ahvâline ve miyânede vâkiʿ (78b) husûmetin sebebine vukūf içün geldiklerini ve muhtâc oldukları su ve sâir levâzımın tahsîlinde zahmet ber-taraf olup Rusyalu'dan şimdilik bir vazʿ-ı nâ-bercâ zuhûr etmediğini tahrîr eylediklerine binâen liman-ı mezkûrdan münfekk olmayup Rusyalu tarafından husûmete müteʿallik keyfiyet tahakkukunda Sinob tarafına avdet ve serasker paşanın emr ü nehyiyle hareket etmeleri bâbında kapudanlara müekked tahrîrât irsâl eylediğini beyân ve bu tedbîri dahi ehl-i meşveret istihsân edüp, serasker paşaya mukaddemâ işâret olunduğu vech üzere yedi sekiz bin asker ifrâz ve irsâliyle cem'iyetini tefrîk münâsib görülmeyüp sefâin-i mezkûre Sinob'a munsarif olmak lâzım geldikte tertîb-i evvel olan kırk bin askerin cemîʿ-i mühimmât ve edevât ve kâffe-i levâzımâtım görüp, donanma-yı hümâyûn ile kapudan paşanın Bahr-i siyâh boğazından çıktığını tahkīk eyledikte kendüsü dahi Sinob pîşgâhında mevcûd olan sefâine rükûb ve münâsib gördükleri iskelelerin birinden hurûc ile istihlâs-ı Kırım'a ikdâmları rey-i mergūb olduğundan başka Tolçı'dan İsmâîl tarafına mürûr içün cisr binâ ve Özi'ye imdâd etmek ve iki kıt'a çekdirme Özi sâhilinde bulunmak maddeleri meclis-i meşverette istisvâb ve iktizâ eden mahallere ifâde ve işrâb olundu.