Bir müddetten berü Tiflis ülkesini teshîr ve maʿâdin-i sîme zafer ile debdebe ve ihtişâmını tevkīr eden Tiflis Hanı Berkerek bârân-dîde ve tasarruf-ı mülk ü reʿâyâda tavrı pesendîde olduğundan ülke-i mezbûre halkı hükmüne râm ve civârında bulunan hanlar dahi savletinden havf-nâk oldukları maʿlûm-ı hass u ʿâm olup düvel-i gālibeye bi't-tabʿ mâil ve icrâ (76b) ettiği resm-i dostî ve safvet-i mazarratlarına hâil olup ez-cümle Rusyalu ile tarh-ı bezm-i muvâneset ve muhâdene sûretinde ʿakd-i şurût-ı muhâdenet ve Devlet-i ʿaliyye'ye dahi gâh ve bî-gâh mürâcaʿat üzere mülkünü himâyet eyler idi. Zend Kerim'in zuhûrundan tersân ve tarafından bir bâdire zuhûr etmek ihtimâlâtı hâtırında cevelân edüp hem-hudûd olduğu Devlet-i ʿaliyye'ye istinâd zımnında dâimâ fursat-hâh ve bir sebeb zuhûruna medd-i târ-ı nigâh eylediği hâlde Devlet-i ʿaliyye-i ebediyyü'l-karâr Zend Kerim'i her taraftan tazyîk irâdesiyle Azerbaycan halkını telîf ve nâme ve atiyyât ile taltîf ve mezbûru dahi bu iltifâta terdîf edüp zikr olunan iltifât maksad-ı aslîsine mutâbakat ile mezbûru serîr-i âverde-i mübâhât eyleyüp teşekkürü hâvî bundan akdem ʿatebe-i ulyâya arîza-i ubûdiyyet takdîm ve emr ü nehy-i şehen-şâhîye inkıyâdını terkīm eylemişidi. Hânân-ı Azerbaycan Zend Kerim'in etvâr ve reftârını hârice çıkarmak ve zuhûr ve taʿayyününden mahzûr tekevvün etmediği hâlde ke'l-evvel mutlakü'l-ʿinân ve bir devletin makhûr-ı dest-i tasallutu olmamak fikriyle Devlet-i ʿaliyye'ye lâ vü naʿam cevâbını veremeyüp mütereddid beyne'l-emreyn ve tecâfâ ani'l-cânibeyn hâletlerini izhâr etmişler idi. Tiflis hanı cümleden kavî ve hûş-yâr ve mücâvir olduğu devletlerin hâline nazar ile istihrâc-ı ʿâkıbet-kâr etmek hulâsa-i endîşe ve efkârı olup Zend Kerim'in eclâf-ı nâsdan olup etrâfa galebe ile bağteten zuhûrunu çekemeyüp bu hâl ile devleti pây-dâr olmayacağını mütâlaʿa ettiyse dahi giderek Nâdir Şah gibi kesb-i taʿayyün (77a) ve taht-ı İran'da temekkün edüp muhâliflerini tedmîr ve memleketlerini teshîr etmek evhâmından dahi hâlî olmayup Devlet-i ʿaliyye'ye yalnızca istizhâr ve sâir Azerbaycan hanlarını verâsında bırakmak Zend Kerim'in cümleden evvel üzerine zikr olunan hanları taslît etmek ve müstazhir olduğu devletin imdâdı vürûduna dek hânmânı ber-bâd olacağını tasavvur ile bu dâü'l-izâle tedbîr-i dil-pezîr ile ilâc etmek makāsıdını tahsîle müsâraʿat ve Devlet-i ʿaliyye'ye tavʿ u inkıyâddan hâsıl olacak vücûh-ı menâfiʿ-i hem-civârı olan hanlara ifâde ile cümlesini fermân-ber-i Devlet-i ebed-müddet edüp, yedlerinden muʿteddün-bih senedler ve mahtûm ve mumzâ vesîkalar ahz ve dâiresinde olan ketebenin ser-âmedi Mirza Gergin ( كركين ) ile atebe-i aliyye-i cihân-dârîye irsâl ve baʿzı hedâyâ ile ihlâs ve ubûdiyyetini ikmâl eylediğinden başka, mirzâ-yı mezbûr Tiflis hanı Devlet-i aliyye'ye an-samîmü'l-bâl bende olup Rusyalu'dan katʿ-ı peyvend-i ittihâd ve sâir Azerbaycan hanları dahi Zend Kerim'den bilkülliye tebrîd olunup emr ü nehy-i devlete münkād ve baʿd-ezîn taraflarından hilâf-ı rızâ-yı devlet bir vazʿ u hareket zuhûr etmeyeceğini şifâhen takrîr ve îrâd ve keyfiyet-i mezkûrenin sıdk u hakīkate makrûn olduğunu tekîd içün Çıldır vâlisinin mebʿûsunu işhâd eyleyüp Tiflis hanının mutâvaʿatı ve sâir hanları ictizâb bâbında sebkat eden hidmeti karîn-i istihsân ve bir sevb-i ferve-i semmûr ve at takımı ve bir mücevher saat irsâliyle mağmûrîn, lutf-i bî-pâyân-ı şehriyâr-ı zamân oldu.