Müşârünileyh hânedân-ı ulemâdan ve Minkārî neslinden olup servet ü yesârı hadden efzûn ve her tarafta bir kâşâne her cânibde bir hâne tedârikiyle mahsûd-ı aʿlâ ve dûn olduğundan fazla fart-ı nüfûz ve iʿtibâr sebebi ile dâiresi müzdehim-gâh-ı erbâb-ı hâcet ve bâ-husûs taşrada bulunan aʿyân-ı memlekete kuvvetü'z-zahr-ı iʿânet ve bu mukābelede dahi mükteseb-i sunûf-ı fevâid ve menfaʿat olup velhâsıl Nazm: تفرقت الظباء على خداش فما يدري خداش ما يصيد Kavlince nukûd-ı atrâf bilâ-meşakkat tarafına seyelân ve tuhaf-ı bilâd min-gayri taleb semt-i câzibesine meyelân edüp bu nuʿûmet-i hâl ve imtiyâzâta kanâʿat ile umûr-ı devlete taʿrîzden mücânebet ve bir fehvâ-yı nazm إن جئت أرضا أهلها كلهم عور فغمض عينك الواحدة İttifâk-ı ârâ ile nazm-ı şevârid-i umûr-ı saltanat edenlere dahl-i bî-câdan mübâʿadet ve şart-ı ittifâka riʿâyet lâzım iken kemâl-i tereffüh ve tenaʿumdan tevellüd eden batar u gaflet hasebiyle bu emr-i (76a) gayr-ı maʿkūlden fâriğ olmayup mağlûbiyet-i etbâʿ ve teseyyüb-i levâhik ü eşyâ dahi kendüyi mevzûʿ-ı bahs ve menfûr-ı tıbâʿ edüp, giderek hussâd ve aʿdâsı fursat-yâb ve gerde ve nâ-gerde mesâvî ve kabâyihini îsâl-ı sâmiʿ-i şehriyâr-ı âlî-cenâb ve nefy ü tağrîbi bâbında ihzâr-ı esbâb etmişler idi. Ancak müşârünileyh kesret-i taʿallukāt ve havâşi ile meşhûr ve nefyi bâʿis-i güft ü gû olmak mahzûru hâtır-ı şâhâneye hutûr ve bu râz-ı müstetir vicâhen sadrıazama ifşâ olunup "emr-i hümâyûnda suʿûbet-i nâ-bûd ve tenfîz-i hükm-i sultânî şimdi mümkündür” deyü istirhâs ve defʿ-i mahzûr ile filhâl çavuşbaşı ağayı me'mûr ettiğinden başka o havâlide mütenekkiren geşt ü güzâr etmek husûsunu yeniçeri ağasına îmâ ve işʿâr etmişidi. Çavuşbaşı ağa emr-ı celîlü'ş-şânı irâet ve derhâl inkıyâd ve itâʿat edüp çavuşlar kâtibi mübâşiriyeti ile Gelibolu'ya isrâ ve çok geçmeden aʿdâsı medd-i rişte-i iftirâ ve hücceten azîmet maddesini ilkā ile bakıyye-i ömrünü ifnâ eylediler. Nitekim zîrde tafsîli gelecektir. Münhal olan Rumeli sadâreti mukaddemâ pâye ile cevher-i ikbâli fürûzân olan Dürrîzâde Nurullah Efendi'ye tevcîh ve ihsân olundu.