Hıtta-i mezkûrede vâkiʿ olan muhârebe ve ihtilâl hasebiyle Şâhin Giray (75a) makāmında adem-i istikrâr ile firâr eylediğine binâen hanların üss ü akdemi olan Selim Giray Han etbâʿ ve icmâʿ-ı kabâil ile han nasb olunup zikri sebkat ettiği vech üzere donanma-yı hümâyûndan ifrâz olunan merâkib-i sultâniye dahi müstevfâ asker teşhîn ve “Tatar imdâdı” ünvâniyle Kırım'a taʿyîn olunmuşidi. [Mısra]: تجري الرياح بما لا تشتهي السفن mefhûmunca mevsim-i deryâ hulûl etmediğine binâen muhâlif rüzgârlar hübûb ve Kırım'a duhûlün imkânı meslûb olduğundan sefâin-i islâmiye berü yakalara meyl ile muhârebeden cerr-i zeyl ve hükm-i kazâ vü kader ile keyfiyet Rusyalu'nun makāsıdma mûcib-i neyl olup bağteten Kırım'a duhûl ve Şahin Giray'ı cebren ve kahren mesned-i hâniye ikʿâd ve ibâd-ı zaʿîfü'l-iyâde taslît ile izhâr-ı envâʿ-ı fesâd eylediler. Selim Giray dahi bu keyfiyete vâkıf ve meks ü ikāmetten tersân ve hâif olup İstanbul'a vâsıl ve mâcerâyı ale't-tafsîl nâkıl olup Rusyalu'nun metâlib-i kâmineleri münkeşif ve müttezih ve bu bahâneler ile hudûd-ı islâmiyeye duhûl ihtimâli kulûb-ı evliyâ-yi devlete lâyih olmağla mukaddemâ İsmâil seraskeri ordusuna tertîb olunan cüyûş-ı islâmiye teksîr ve mühimmât ve edevât ve zehâir ve levâzımât-ı sâiresi tevkīr olunmak irâdesiyle Rumeli ve Anadolu taraflarına mukaddem ve kâr-güzâr mübâşirler ve sürücüler tesyîr olundu.