Bâlâda beyân olunduğu vech üzere Rusyalu'nun hilâf-ı ahd ü şurût Kırım'ı bilkülliye âverde-i dest-i temellük ve zabt mukaddemâtına bed ü mübâşeret eyleyüp Kırım'a idhâl-i asker-i kesîf ve gûnâ-gûn teklîf ile ahâliyi tahvîf ve şart-ı serbestiyete münâfi tavr ibrâziyle Devlet-i aliyye'yi müceddeden harb gāilesine ilcâ (74b) ve bu maddelere müşâbih tahakkümü evzâʿ-ı ihtirâʿıyla saltanat-ı seniyyeyi masârif-i kesîreye mübtelâ eyleyüp ahâli-i Kırım'ın menfûru olup sefer esnâsında firâr eden Şâhin Giray'ı cebren hân etmek içün maʿiyetine vâfir asker taʿyîn ve kabâil-i Tatar mecmaʿına tisyâr ve marzîleri olmadığından birkaç defʿa katlini irâde ettikleri resîde-i derece-i iştihâr olup Âsitâne'de mukīm Rusya elçisiyle bu maddeler kirâren ve mirâren müzâkere olunup her mecliste bu gûne kelâm ile tehîr-i maslahata kıyâm ve encâm-ı kâr Şâhin Giray'ın hânlığı içün cebr ve istikrâh ile tahsîl ettikleri mahzarı taraftarları olan birkaç nefer Kırımlu ve kabâil-i süfehâsıyla Âsitâne'ye gönderdiklerini beyân ve “mezbûrun hânlığı devletimin matlûbudur" diyerek şarta muhâlif hezeyân eylediğinden başka bundan akdem Kabâil-i Tatarı tergîb ve terhîb vâdilerinde taraflarına isticlâb içün irsâl eyledikleri memhûr mekâtîb dahi eyâdî-i devlete resîde olup niyetlerinde fesâd ve tavr u hareketlerinde şâibe-i zabt-ı bilâd tahakkuk eylediği ve Devlet-i aliyye her ne kadar riʿâyet resm-i ihtiyât ile hıfz-ı memleket ve Kırım halkına imdâd sûretlerini ihtiyâr ettiyse dahi bu gāilenin ahde muvâfık cihât ile indifâʿına tâlib ve sulhü cenge tercîh Devlet-i aliyye'ye rey-i gālib olduğu mufassal ve meşrûh takārîr tahrîriyle düvel-i nasârâya neşr ü ihbâr ve Devlet-i aliyye'nin özr-i müveccehi ve Rusyalu'nun kibr ü gurûr ile hilâf-ı uhûd hareketi zikr olunan takārîre derc ve tezbâr olundu.