Şevvâl'in onbirinci günü sulb-i şehen-şâhîden bir cesed-i bî-rûh zuhûr edüp istihlâl vâkiʿ olmadığından resm-i âdî terk ve ilgā ve Dârüssaâde ağası mübâşeretiyle o laht-pâre-i bî-kuvâ gunûde-i pester serî kılındı. Kapudan paşa lede'l-iktizâ bahreynin birine gitmek üzere hâzır ve müheyyâ ve rûz-ı Hızır'dan Kāsım'a dek Ortaköy pîşgâhında ârâm ve şehr-i mezkûrun yirmibeşinci günü alay resmi icrâ olunmayarak ma'iyetinde olan sefâini mersâ-yi tersâneye rabt ile memûriyetini itmâm eyledi.