Kısteyn mevâcibini bi-eyyi vech-i kân cemʿ ü temîm ve tavâ'if-i askerînin cümlesine tevzîʿ ve taksîm, şıkk-ı evvel defterdârı olan Hasan Efendi'nin lâzıme-i zimmeti iken kısteyn mürettebâtından dört yüz kise kadar meblağı umûr-ı sâ'ireye sarf edüp, vaktiyle mevâcib ihrâcı dahi merkûz-ı zamîri olmağla sergiye vefâ edecek akçeyi tehniye ve bâkî kalan dört yüz kise akçeyi an-yed ashâbı kabz ve alâ-mehlin lâzım gelenlere tediye eylediklerini cezm ile baʿde'd-devr zikr olunan meblağı tanzîm ve tesviye ile edâ eyleyeceğini sipâh ve silâhdâr ağalarına ve hulefâ-yı aklâma ifâde ve inhâ ve anlar dahi irâ'et-i sûret-i tavʿ u rızâ eyledikleri Bâbıâlî'ye takrîr ve iş bu Şaʿbân evâhirinde mevâcib ihrâc olunup agnâ-yı sagīr ü kebîr kılınmışidi. Devirden sonra sipâh ve silâhdâr ocakları müteʿayyinlerinden cemm-i gafîr ağalarına varup “mecmûʿ ocakların mevâcibi tamâmen verilmişiken bizim mevâcibimiz niçün te'hîr olundu" deyü güft ü gûya âğâz ve ağaları ve sâ'ir zâbitleri dahi "akçeyi virsünler, virelim" kelâm-ı bâridiyle (69a) rişte-i zebân-dırâz eylediklerinde birkaç nefer bürehne-pâ ve üryân Paşa-kapusu'na varup nâle vü efgân ve ulûfe talebiyle çâk-i girîbân edüp tekmîl mevâcibleri vaʿdiyle ne hâl ise defʿ-i meclis olundise dahi bu vazʿ-ı garîb, tahrîk şâ'ibesini îhâm ve telmîh ile filhâl Sipâh Ağası Hatibzâde ve Silâhdar Kalemi Baş Halîfesi Halîl Efendi'ye sebeb-i nefy ü tağrîb olup inebâliğ-i bakiyyenin edâsı için defterdar efendi dahi tedârik ve teslîm-i bakiyye ile vâreste-i havf-i inʿizâl oldu. Bundan akdem vezâreti refʿ ve maskat-ı re'si olan Yenişehir'de ikāmeti irâde olunan İsmâil Paşa'nın seferde olan zahmet ve meşakkati hüsrev-i devrâne taʿbîrât-ı rikkat-engîz ile serd ü beyân ve hakkında rahm ü şefakat-i hıdîvâne nümâyân olup kayd-ı vezâreti tecdîd ve Kandiye Eyâleti ile binâ-yı ikbâli teşyîd ve selefi Silâhdar Mehmed Emîn Paşa'ya Hanya ve selefi Yazıcızâde Mustafa Paşa'ya Resmo Sancağı tevcîh olunup bir an akdem mansıblarına azîmetleri tenbîh ve te'kîd olundu. Yirmi seneden beri Tefsîr-i Beyzâvî ile talebe-i ulûma takrîr-i Hakāyık-ı Kur'ân-ı Azîmü'ş-şân eden Köprülü Halîl Efendi şehr-i Ramazan'ın onsekizinci günü Tefsîr-i mezkûru ikmâl ve meclisinde katı çok ekâbir ictimâʿ ve ihtifâl edüp Hatim duʿâsını kırâat ve pâdişâh-ı dil-âgâh hazretlerini senâ-ı mahsûs ile tezkâre mübâderet edüp yümn ü bereket-i meclis ile hâzır olanlar kesb-i lezzet-i rûhânî ve celb-i inbisât-ı cismânî eylediler.