Farîza-i gazâ vü cihâdı iʿtiyâd ve te'yîdât-ı ilâhiyye ile zabt-ı bilâd-ı erbâb-ı küfr ü inâd eden Devlet-i aliyye-i ebediyyü'l-istimrâr seferlerde süvâriye muhtâc olduğundan ıktâʿ-ı arâzî-i mîrîden her şahsa ifrâz-ı mekân ve tîmâr ve zeʿâmet iʿtibâriyle her birini sâhib-ı tâb ü tüvân edüp nânpâreleri mahsûlüyle kesb-i refâhiyet ve sefer vukūʿunda iʿmâl-ı seyf ü sinân ile izhâr-ı celâdet ve hafr-ı hendek ve hıfz-ı serhadde zâhir olan metânetleri (68a) ve sâir umûr-ı cengte mesbûk olan hidmetleri yâd-daşt-ı erbâb-ı tecrübe ve hunket olup ancak bir müddetten berü nizâm-ı hâlleri muhtel ve nânpâreleri eyâdî-i bî-gâneye geçüp seferber olduklarında mültezimleri yedinden akall-i kalîl bedel ahziyle idâre-i umûr edemeyüp âvâre-i şugl ü amel olduklarından gayrı sevret-i askerîye mâniʿ olan hidmet-i ağniyâya mübâderet ve ricâl dâirelerinde mil'i batna kanâʿat ve bu vechile nânpârelerini himâyet ve alay beğileri dahi ekser hâlde eclâf-ı nâstan bulunup kuvve-i mâliye ile o rütbeyi tahsîl ve hasımları tek durmayup üç ayda bir istediklerini makāmında tenzîl ve alaybeğilerin zimâm-ı azl ü nasbları yedlerinde olan ekâbir dahi istihsâl-ı câize ile nîk ü bedi aramayup azl-i muʿaccelde muzmer olan fesâdâta bakmayup tevcîhde istiʿcâl ve bu vesâil ile gürûh-ı mezkûr dahi giriftâr-ı ser-pençe-i iztırâb-ı hâl olup, bundan sonra sefer zuhûr ettiği takdîrde kavm-i mezkûr etvâr-ı sâbıkaların icrâda bî-tâb u kudret ve ekser-i tîmâr ve zeʿâmetden dest-şû-yi ferâğ olarak cünûd-ı mürettebe-i devlete taryân-ı kıllet ihtimâlinden başka seferlerde tecrübesi sebkat eden evbâş-ı levend ve süvârî-i aşâire devlet muhtâc olup muhârebe vukūʿunda yek-lahza şiddet-i âlât-ı nâriye-i aʿdâya tâb-âver olmayup firâr-ı ani'z-zahf hatîasını irtikâb ve bu sû-i sanîʿ sâir asâkire sirâyet ile evliyâ-yı umûru tâkat-güdâz-ı pîç ü tâb eyleyecekleri bî-irtiyâb olmağla tâ'ife-i mezkûrenin nizâm-ı hâlleri resîde-i derece-i vücûb ve kānûn-ı kadîmleri icrâ ve baʿzı avârız ile terk ve ilgā olunan şurûtları (68b) tecdîd ve ibkā olunması inde'l-ukalâ bir emr-i mergūb olduğundan kethüdâ-yı hazret-i âsafî Süleyman Feyzi Efendi ve re'îsülküttâb olan Ömer Vahîd Efendi ve bilfiʿil defter emîni olan Elhac Abdürrezzak Efendi bu husûs-ı lâzımü'l-iʿtinâya me'mûr olup verdikleri nizâm hatt-ı hümâyûn ile te'kîd ve cerâ'id-i aklâma kayd ile maʿü'l-izâfe kānûn-ı kadîmleri tecdîd olunup tafsîline ıttılâʿ-ı murâd edenler mahalline mürâcaʿat etmek üzere te'sîr-i sevâd-ı evrâktan ictinâb ve terk-i tavr-ı ıtnâb ile meslek-i ihtisâr istihbâb olundu.