İrâniyân ile Devlet-i aliyye'yi gā'ile-i cenge ilcâ eden Baban Sancağı mutasarrıfı Mehmed Paşa ve karındaşı Ahmed Paşa ve sâ'ir aʿmân ve akāribi Bağdâd vâlisinden müsteşʿir ve mürgân-ı vahşî gibi sahrâ ve beyâbâna müstenfir olup giderek taht-ı minnet-i Aʿcâm'a duhûl ve ahz-i sâr daʿvâsıyla memâlik-i mahrûseye hücûm ve vügûl kasdın etmişler idi. Bu kasd muhtemelü'z-zarar Musul [63b] Vâlîsi Vezîr Hasan Paşa'ya sebeb-i efzâyiş-i keder olduğuna binâen merkūmları baʿzı tergībât ile itāʿat-i devlete celb ve iʿtimâd-ı küllî vererek havf u haşyetlerin selb edüp pîrâmen-gül-zâr-ı hudûd-ı Devlet-i aliyye'de mânend-i hass ü hâşâk terâküm eden Terkeme-i Aʿcâmı tîğ-i şuʿle-bâr-ı celâdet ile ifnâ ve o havâliyi tathîr ve tasfiye ile ferâ'ine-i İrâniyâne irâe-i yed-i beyzâ etmeleri bi'l-muhâbere müzâkere olunup maʿiyyetlerine vâfir asker taʿyîn ve mühimmât ve cebehâne ile bâzû-yı iktidârları tahkîm ve tarsîn kılınmışidi. Mûmâileyh dahi hulûs-ı bâl ile icrâ-yı me'mûriyete iştigāl ve mezbûr Mehmed Paşa Sine yolundan ve birâderi Dağ-ayağı yolundan asâkir-i deryâ-misâl ile cûş ü hurûşa gelüp Musul vâlîsi dahi verâlarından teʿâküb eyleyeceğini mukaddemâ atabe-i gerdûn-mertebe-i şâhâneye tafsîl ve icmâl etmişidi. Asâkir-i devlet hudûda takarrüb eylediklerinde onüç saat içerüde vâkiʿ Bâne Hânı'yla muhâbere ve Devlet-i aliyye'ye rû-yı itāʿat izhâr eylediği hâlde il ve memleketi vâreste-i gezend-i asker ve kendüsi dahi idrârât-ı hazret-i zıllullâhî ile nâ'il-i niʿam-ı evfer olacağı ifâde olunup, mezbûr cevâb-ı redd ile âmâde-i ceng ü neberd olduğu tahrîr etdiği mektûbundan müstebân ve berü taraftan "kad aʿzera men anzera" kavli güzârende-i zebân kılınarak ülke-i mezbûre mevtâ-yı huyûl-i asker-i şehriyâr-ı zamân oldu. Bâne Hânı bu hecme-i nâgeh-zuhûrdan mütelâşî ve etrâf ve eknâftan cemʿ-i leşker ve havâşî edüp hâric-i kasabada âğâz-ı kâr-zâr ve bir-iki sâat kadar pây-dâr olup encâm-ı kâr münhezim [64a] ve katı çok Aʿcâm münʿadim olduğundan gayri hân-ı mezbûrun emvâl ve eşyâsı dest-bürd-i yağmâ-gerân ve kasaba halkı dahi gāret-zede-i asker-i zafer-nişân olup rûz-ı maʿrekede üftâde-i tîh-i mezellet olan rüesâ-yı Aʿcâm'ın otuz mikdârı ser- bürîde-i asker-i zafer-rehber olup rüûs-ı maktûʿaları der-i devlet-medâra vâsıl ve kulûb-ı evliyâ-yi devlette inşirâh-ı tâm hâsıl oldu. Bu haber-i bârid sîne-i hânî tarafına vârid olup terk-i nevm ve sîne ve derhâl etrâf ve eknâfdan istiʿâne ile yirmi bin kadar asker cemʿ ve mübâşir-i kıtâl olduğu, rüesâ-yi cüyûş-i devlete münʿakis oldukda, Musul vâlisinden istimdâd ve ol dahi asker-i vâfir irsâliyle şevk ve hâhişlerin müzdâd etmişidi. Sîne'ye iki merhale yerden hân-ı mezbûr asker-i devleti karşulayup âğâz-ı muhârebe ve berü cânibden dahi feth-i derîçe-i mudârebe ve dört saat kadar iʿmâl-i seyf ü sinân ve nihâyetü'l-emr evbâş-ı kızılbaş girîzân olup, bir iki bin kadarı maktûl ve bakiyyetü's-süyûfu resâset-i hâl ve ıztırâb-ı bâl ile hâzım ve mahzûl olduğu haberi müşârünileyh tarafından vârid olup saʿy-i meşkûr ve hidmeti mebrûr olduğunu müşʿir tarafına hitâben emr-i âlî ısdâr ve teşrîfât-ı seniyyeden başka atiyye-i hümâyûn olarak on bin altın tarafına tesyâr olunup Baban hâkimi Mehmed Paşa'ya dahi bir sevb-i semmûr ve dört bin altın irsâl ve bu müjde ile vârid olan tatar ağasına bir zeʿâmet verilüp haklarında sunûf-ı ihsân ve nevâl tetmîm ve ikmâl olundu.