Sâbıkan sadrıazam kethüdâsı olan Esseyyid İbrâhim Efendi'nin surre emâneti ile cânib-i Hicâz'a musammem olan azîmeti fesh ve ilgā ve Kars (61a) cânibi seraskeri Ali Paşa ordusuna nezâret etmek ünvâniyle inân-ı azîmeti o tarafa irhâ olunup, Sırrı Selim Efendi'ye dahi sadrıazamın gayz-ı kadîmi olduğundan Bağdad kapı kethüdâsı olmak mülâbese-i za'îfesiyle Bağdad ve Şehrizor vâlilerine ve sâire bu def'a tertîb olunan hilâ' ve mebâliği îsâl etmek me'mûriyetini tasvîb ve büyük rûznâme pâyesiyle mûmâileyhi zâhirde tatyîb eyledi. Garîbe: Sadrıazam, kapıcıbaşılığı hâlinde Selim Efendi'nin ziyâretine varup haber verdiklerinde sûret-i istiskālde tesettür ve mûmâileyh dahi adem-i mülâkāt hacâletinden izhâr-ı teessür edüp sadrıazam oldukları hîn-i mâcerâyı tezekkür ile hakkında bir nev'-i gûşmâl ve tedîb-i tefekkür eder iken zuhûr eden me'mûriyeti hakkında tahsîl ve Bağdad'a tesbîl edüp bu maddede katı çok mâl itlâf eylediğinden başka Bağdad'da iken süfehâ-yı memleket ictimâʿında az kaldı ki vücûdu seyf ü nîze ile rîze rîze ola zikri fürûmânde ve hâmil ve sevret-i devleti li-illeti zâil olanları istisgār ve hâl ü şânlarını istihkār-ı ukalâ memnûʿ olup la tefrahû bimâ âtâküm medlûlü üzere devlet se-rûzeye iʿtimâd ve sûret-i imtihânda ihtilâs olunan mâl ü câha istinâd ile cihet-i mahlûkıyyetde tekâfü ve tesâvîsi müberhen olanlara izhâr-ı kibr ü nahvet kâr-ı süfehâ ve eşyâyı an-ʿilm-i hakāyıkı üzere görmek ve halkı bi-haseb-i tabakātihim rü'yet etmek meslek-i ukalâ olup çok kere muhakkar add ettiğin şahs-ı mestûrü'l-hâl sevk-i kazâ vü kader ile pâ-nihâde-i merkez-i ikbâl (61b) olup an-cehlin irtikâb olunan tavr-ı hakāret ve istihfâfdan nedâmet ve baʿzen zarar-ı mâlî ve nefsî ile küllî hasâret zuhûr ettiği mücerreb-i erbâb-ı akl ü dirâyettir. Nazm: Ve kem min sagîrin edrekethü ʿinâyetün minallâhi fahtâcet ileyhi'l-ekâbir.