Sinîn-i sâlifeden ezyed donanma sefâininin tertîbine sa'y-i bî-hadd kılınup, kapudan paşa az vakid içinde on dokuz kalyon ve birkaç kıt'a çekdirme ihzâr ettiğini ihbâr eylediğine binâen evâsıt-ı Rebîülâhir'de süfün-i mezkûre mersâ-yı tersâneden fekk olunup Yalı-köşkü pîşgâhında alay irâeti akabinde kapudan paşa ve sâirleri huzûr-ı hümâyûnda telebbüs-i hil'at ile ihrâz-ı derece-i mefharet eylediler. Zikr olunan sefâinden dört kıt'ası ifrâz olunup kethüdâsı maʿiyyeti ile Bahr-i sefîd cânibine irsâl ve iki kıt'ası Sinob'da inşâ ve tekmîl olunan iki kıt'a cedîd kalyonu Âsitâne'ye îsâl içün i'mâl ve bâkīsi hîn-i hâcette istihdâm olunmak içün Ortaköy pîşgâhında ibkā ve kapudan paşaya dahi Genç Mehmed Paşazâde İbrâhim Bey'in sâhil-hânesinde ikâmet ile ahvâl-i bahreyne nezâret etmek irâdesi îmâ olundu.